6 знаци дека ентериерот ви е како затворска ќелија (и како да ги коригирате грешките)

Стерилен простор без украси, целиот мебел залепен за ѕидот - некои грешки во уредувањето на домот прават просторот да делува како затворска ќелија, а не удобно место за живеење.

Дали ви се случило да погледнете во просториите во домот и иако сè е на место и убаво подредено, сепак ентериерот да ви делува здодевно?

Ако одговорот е да, верувајте, не сте единствените што мислат така. Иако вашиот дом е прекрасен, сепак е стерилен, како затворска ќелија.

Што треба да направите за да го смените тоа?

Стерилен простор

Многу домаќинства ја бркаат идејата за совршен ентериер, како на фотографиите на интернет, па оставаат многу површини во домот празни - без книги, фотографии, украси - сè што имаат е ставено во некој плакар.

Убаво е да постои ред во домот, но стерилноста ја убива целата удобност и го  прави местото во кое живеете студено, наместо топло и пријатно катче.

Празни ѕидови

Многу луѓе не ставаат ништо на ѕидовите од страв дека ќе останат дупки, траги од шајки или од дуплофан на местата каде што закачиле слика или некој украс.

Како резултат на тоа, ентериерот делува здодевен и студен, баш како затворска ќелија.

Сè во една боја

Монохроматскиот изглед не е идеален за уредување, бидејќи поради едната боја, парчињата мебел се стопуваат со ѕидовите, на пример и ентериерот делува како една огромна просторија без почеток, крај и детали.

Ако сакате монохроматски ентериер, додадете барем 1 или 2 парчиња во друга нијанса, но и предмети во истата боја со текстура, за да го „оживеат“ просторот.

Целиот мебел е залепен до ѕидот

Ако креветите ви се залепени до ѕидот, а притоа и телевизорот ви е закачен на ѕидот, а покрај ѕид ви се и украсните цвеќиња (за да имате слободен простор во средината на собата, на пример), верувајте, собата ќе ви делува чудно и смешно.

Дајте му „длабочина“ на просторот така што дел од предметите ќе ги одвоите од ѕидовите.

Едноличен мебел

Ако целиот мебел во една просторија ви е од еден тип, тогаш ентериерот делува здодевно.

Ставете едно столче или фотелја од друг вид за да ја разбиете монотонијата и да му дадете живост на просторот.

Ентериер кој е ист како внатрешноста на секој друг дом

Бела боја на елементите во кујната, мал лустер, сиви столчиња, мал килим - ваквиот ентериер потсетува на голем број домови, а му недостига индивидуалност, личен печат и топлина, па затоа избегнувајте да го уредите просторот како повеќето луѓе.

А. Ј. | Црнобело