Совети за одгледување хортензии: Каде да ги засадите за да цветаат повеќе?

Хортензиите можат да ви ја разубават градината или балконот, но важно е да знаете дека се токсични за животни, па доколку имате миленик, чувајте ги надвор од негов дофат. Што друго треба да знаете за овој убав цвет?

Ако барате растение со големи цветови, тогаш со хортензијата нема да погрешите. Ова цвеќе може да порасне како грмушка, брзо расте и за кратко време ќе го пополни просторот во вашата градина.

Хортензиите се повеќегодишни растенија кои од година во година непрекинато даваат цветови. Положбата на садење, негата, рутината за прихранување и наводнување може да влијаат на нивото на цветање. 

Неколку совети за одгледување хортензија:

Садење

Најдобро е хортензијата да ја засадите во есен или рана пролет. Важно е да ѝ се даде доволно време за да воспостави здрав коренов систем пред да цвета.

Најдобро време од денот за садење е рано наутро или доцна попладне. Поладните делови од денот нудат заштита од топлотен стрес. Додека не се создаде здраво растение, наводнувајте ја хортензијата често.

Најдоброто место за садење на хортензијата е заштитена локација, со сончеви утра и попладневни часови со сенка.

Избегнувајте садење директно под дрвја, за да не ѝ се одзема водата и хранливите материи, а исто така засадете ја на место каде што е заштитена од силен ветер, бидејќи ветрот може да ѝ ги уништи цветовите и да ѝ ги оштети ливчињата.

Што се однесува до почвата, добрата дренажа е од витално значење. Иако хортензиите сакаат влажна почва, тие не толерираат премногу влажност.

Влажната почва со слаба дренажа може да предизвика гниење на коренот, и тоа за само неколку недели.

Размножување на хортензија

Најлесен начин за размножување на хортензија е со исечоци. Едноставно, исечете гранка долга неколку сантиметри. Изберете понов зелен раст, а не стар кој тешко ќе се вкорени.

Ставете хормон за вкоренување и засадете го гранчето во саксија. Одозгора ставете пластичен капак за да го зголемите нивото на влажност и да поттикнете нов раст.

Нега на хортензијата на крајот на сезоната

Кога ќе заврши сезоната на цветање, средете ги растенијата со сечење и кроење.

Во зависност од местото на садење, доколку е изложена на интензивен студ, хортензијата може да ја покриете со ткаенина за да ја заштитите од мраз, а исто така мулчирањето може да ви помогне да го заштитите кореновиот систем во текот на зимските денови.

Токсичност на хортензијата

Хортензиите се сметаат за отровни за луѓето и за животните. Листовите, пупките и цветовите содржат цијаноген гликозид, кој може да предизвика гадење и повраќање при голтање.

За оние со чувствителна кожа, тие исто така може да предизвикаат мала иритација.

Голтањето обично не е фатално, особено кога е во мали количини, но се препорачува растенијата да се чуваат колку што е можно подалеку од деца и домашни миленици.

М. Ѓ.| Црнобело / фото: freepik.com