Што се омега-3 масни киселини, која е нивната функција и дали ви се потребни додатоци во исхраната?

Омега-3 масните киселини се добри за срцето и му даваат енергија на нашето тело, но повеќето луѓе воопшто не треба да земаат додатоци, особено не без консултација со лекар – што друго треба да знаете за омега-3 масните киселини?

Постојано слушаме за омега-3 масни киселини и сите знаеме дека се добри за нас.

Исто така, на скоро сите ни е добро познат фактот дека омега-3 масните киселини се најприсутни во рибата како лосос.

Што точно претставуваат овие масни киселини, кои се придобивките од нив и дали е потребно да внесуваме поголемо количество со помош на суплементи?

Што се омега-3 масни киселини?

Најпрво да разјасниме што се масни киселини.

Масните киселини се градежните единки на мастите во нашето тело, но и храната што ја консумираме.

Кога желудникот ја дигестира храната, ги разградува масите во масни киселини кои потоа се апсорбираат во крвта.

Тие се молекули составени од атоми на јаглерод, кислород и водород.

Постојат четири „главни“ видови масни киселини – заситени, монозаситени, полинезаситени и трансмасти.

Од четирите, заситените и трансмастите се поврзуваат со зголемен ризик за проблеми со срцето.

Омега-3 масните киселини спаѓаат во категоријата полинезаситени масни киселини кои делуваат позитивно на нашиот организам.

Бидејќи нашето тело не може да ги произведе сами, важно е да ги внесуваме преку храна.

Која е функцијата на омега-3 масните киселини?

Омега-3 масните киселини ја одржуваат функцијата на клетките во нашето тело.

Тие се дел од клеточната мембрана и ја поттикнуваат интеракцијата помеѓу клетките.

Истовремено, омега-3 масните киселини го снабдуваат телото со енергија и го поддржуваат здравјето на многу делови од организмот, како кардиоваскуларниот и ендокриниот систем.

Дали има придобивки од зголемено внесување омега-3 масни киселини?

Некои истражувања покажале дека омега-3 масните киселини можат да го намалат ризикот од кардиоваскуларни болести, но и ризикот од смрт ако веќе имате некоја ваква болест.

Истражувањата покажале дека можат да бидат корисни кај пациенти со Алцхајмер или деменција, а можат и да ги намалат триглицеридите.

Но, важно е да се нагласи дека повеќеот истражувања не покажуваат дека зголемениот внес на омега-3 масни киселини ги намалува ризиците од болести.

Генерално, истражувањата покажуваат дека овие масни киселини се добри за нашето здравје и само треба да внимаваме да не се појави недостаток од нив во организмот.

Кои се најдобри извори на омега-3 масни киселини?

Рибата е најдобриот извор на омега-3 масни киселини.

Но, има големо количество и во намирници како зеленчукови масла, јаткасти плодови (особено ореви), ленено семе и зелен лиснат зеленчук.

Дали треба да земате додатоци?

Ако се храните разновидно и немате проблеми со здравјето, нема потреба да земате додатоци и секогаш е подобро да ги внесувате со храна.

Ако сметате дека ви требаат и додатоци, морате да се консултирате со лекар. Земањето додатоци на своја рака може да биде и ризично.

Можеби, на пример, некои лекови што ги пиете не треба да се мешаат со додатоци со омега-3 масни киселини.

Ако, пак, не знаете колкава доза ви е потребна, можно е да се соочите со некои несакани ефекти.

Доколку имате високи триглицериди или некакви проблеми со срцето, можно е да ви требаат суплементи, но тогаш и вашиот лекар ќе ви го нагласи тоа.

Можно е да ви требаат суплементи и ако сте веган, вегетаријанец или многу ретко јадете риба. Но, и во овој случај, не земајте ништо пред консултација со лекар.

Спирова С. | Црнобело