Зошто ги триете забите и како да се ослободите од оваа навика?

Триењето на забите, или бруксизам, е нарушување со кое се соочуваат околу 20% од возрасните ширум целиот свет.

Може да биде навистина тешко да се oслободите од оваа навика, особено ако ги триете забите навечер, додека спиете.

Проблемот е што ако не преземете нешто, со текот на времето можат да настанат проблеми како ослабување на емајлот на забите и абфракција, односно губење на забната површина кај непцето.

Па, што можете да направите во врска со ова?

Како да откриете дали ги триете забите?

Постои ноќно и дневно триење на забите. Има луѓе кои ги тријат забите во текот на денот, но и луѓе кои го прават ова само додека спијат.

Повеќето луѓе кои ги тријат забите во текот на денот се свесни за својата навика, но оние од втората категорија многу често не ни знаат дека го прават тоа.

Ако се сомневате дека ги триете забите додека спиете, треба да обрнете внимание на неколку знаци:

• Болка и чувствителност на забите
• Промени во изгледот на лицето – сте забележале дека краевите на усните се спуштени надолу
• Болки во лицето
• Проблеми со џвакање и рани во внатрешноста на устата
• Тапа болка кај слепоочниците, а некогаш и во долната вилица

Ако не сте сигурни, вашиот заболекар може да ви го дијагностицира овој проблем.

Како да престанете со триење на забите?

За третман за оваа навика најдобро е да се обратите кај вашиот заболекар, но добро е да знаете и кои се вашите опции.

Набавете штитник за уста. Ова е еден од најчестите третмани, но штитникот нема да го сопре триењето на забите, туку ќе ја намали штетата.

Обично штитниците се за луѓе кои ги тријат забите навечер, но ако не можете да се контролирате во текот на денот, можете да го носите и тогаш.

Справете се со стресот и анксиозноста. Стресот го поттикнува триењето на забите и стегањето на вилицата, па ако се справите со него, можно е да го намалите и интензитетот на бруксизмот. За ова можете да пробате медитација, вежбање, но и да побарате помош од професионалец.

Релаксирајте се пред спиење. Ако ги триете забите навечер, обидете се пред спиење да се ослободите од стресот.

Не џвакајте ништо освен храна. Ако ги триете забите, подобро избегнувајте ги гумите за џвакање и избегнувајте да ставате во уста сè што не е храна.

Правете вежби за јазикот и вилицата. На некои луѓе овие вежби им помагаат да го намалат триењето навечер. На пример, со врвот на јазикот притискајте го горниот дел од устата и наизменично отворајте ја и затворајте ја. Оваа вежба може да ја намали напнатоста во мускулите околу вилицата.

Пробајте ботокс. Нормално, најпрво треба да се консултирате со лекар пред да се одлучите на овој чекор. Не е сосем јасно дали ботоксот навистина помага, а бидејќи трае само од 3 до 6 месеци, ова е привремено решение. Секако, ова не е решение прифатливо за секого.

Што го предизвикува триењето на забите?

Ова нарушување може да се појави на секоја возраст. Некогаш децата почнуваат да ги тријат забите за да се смират, па продолжуваат со навиката и кога ќе пораснат.

Неретко, причината за триењето на забите е некој емоционален или психолошки проблем, како стрес, анксиозност, посттрауматско стресно нарушување и слично. Токму затоа е важно да ја откриете вистинската причина за вашиот бруксизам.

Според едно истражување од 2018-та, постојат неколку фактори што го зголемуваат ризикот од ова нарушување:

• Пиење алкохол
• Анксиозност
• Пушење цигари
• Рчење
• Стресен живот

Истражување од 2019-та открило уште неколку причини за појава на бруксизам:

• Недостаток од хранливи материи
• Одредени антидепресиви
• Даунов синдром
• Искривени заби

Иако е тешко да се ослободите од бруксизмот, не треба да се откажете. Консултирајте се со вашиот лекар или заболекар за да ја откриете точната причина за нарушувањето, но и за да го најдете најдобриот третман за вас.

Спирова С. | Црнобело