10 трикови и совети со кои ќе им помогнете на вашите деца да изградат добар меѓусебен однос

Ривалството помеѓу браќата и сестрите не е ништо ново и е сосема нормална појава, но некогаш вие, како родител, морате да им помогнете да ги надминат разликите меѓу нив.

Важно е да ги охрабрите децата да се однесуваат добро едно кон друго и да се почитуваат, а со тоа и да им помогнете да изградат добар меѓусебен однос.

Во продолжение погледнете 10 трикови и совети што ќе ви помогнат во тоа:

Избегнувајте да ги споредувате

Сите луѓе се различни и сите имаат свои предности и недостатоци, а ова важи и за вашите деца. Можеби едното дете е одличен математичар, а на другото не му оди математика, но сигурно има друг талент како, на пример, за цртање. Во овој случај никогаш не треба да ги споредувате нивните квалитети. Наместо тоа, помогнете им да се фокусираат на она што им оди.

Почитувајте ги нивните различни желби и потреби

Наједноставен пример за ова е купувањето играчки. Можеби сметате дека ако на двете деца им купите иста играчка тие нема да се караат. Но голема е веројатноста децата да имаат различни вкусови и желби, па подобро е да купите различни играчки со иста вредност, во зависност од интересите на децата.

Истото важи и за вонучилишните активности – ако едното дете сака кошарка, немојте да го присилувате и другото да почне да игра ако тоа повеќе сака танцување или што било друго.

Научете ги да соработуваат

Како родител, важно е да им давате можности на вашите деца да соработуваат. Кога, на пример, станува збор за домашните обврски, направете им распоред – едното дете нека ги измие садовите, а другото нека го исчисти подот.

На овој начин ќе ги научите да си ги делат обврските, без разлика дали во домот или за нешто друго, а со тоа и да соработуваат.

Не се мешајте во нивните разговори

Освен ако децата не почнат жестоко да се караат, најдобро е да не им се мешате во разговорите. Без разлика за што дебатираат, оставете ги самите да го завршат разговорот, освен ако тие не побараат совет или мислење од вас. Во спротивно, ако одбраните едно од децата во дебатата, другото може да почувствува љубомора и одбивност.

Одвојувајте време за семејни активности

Семејните активности како гледање филм или играње игри се одличен начин да се зближете, но и да им помогнете на вашите деца да изградат добар однос едно кон друго.

Научете ги да ги разбираат нивните емоции

Нормално е децата да се скараат и да си бидат лути, но во ваквите ситуации помагајте им да ги разберат нивните емоции. Кажете им дека е нормално некогаш да почувствуваат негативна емоција кон братот или сестрата, но и нагласете им дека подобро е да разговараат за тоа и да кажат зошто се почувствувале така, отколку да се лутат. Со ова децата значително ќе ја подобрат комуникацијата меѓу себе.

Научете ги да си кажуваат убави работи

Покажете им на децата дека треба да си кажуваат убави работи едни на други. Прашувајте ги што им се допаѓа најмногу кај братот или сестрата, охрабрувајте ги да си кажуваат дека се сакаат и дека се ценат…

Ова дефинитивно ќе го зајакне нивниот однос.

Најдете им заедничка активност

Ова е уште еден начин да ги научите децата да соработуваат. Можете да им речете заедно да направат роденденска честитка за член од семејството, заедно да играат некоја игра, заедно прочитаат сликовница или книга…

Не се мешајте кога се забавуваат

Штом ќе забележите дека децата си играат заедно и се забавуваат, немојте да го прекинувате тоа. Некогаш дури и оставете ги да си легнат подоцна или да прескокнат некоја неважна обврска ако гледате дека си поминуваат одлично.

Слушајте ги внимателно и посветувајте им исто време и внимание

Ако едното дете забележи дека му обрнувате повеќе внимание на друго, нормално е да се почувствува лошо, па дури и да почувствува омраза кон братот или сестрата. Вие како родител мора да им обрнувате исто внимание на сите ваши деца. На пример одвојте 15-тина минути пред спиење за секое од децата. Во овој период ислушајте го за сè што сака да ви каже и целото ваше внимание нека биде насочено кон него.

Спирова С. | Црнобело