Родителски грешки поради кои децата не се задоволни од својот изглед кога ќе пораснат

Многу луѓе имаат проблем со самодовербата, особено кога станува збор за нивниот изглед. Неретко, пак, овој проблем потекнува уште од нивното детство.

Секој родител му го посакува најдоброто на своето дете, но бидејќи и родителите се само луѓе, и тие се склони кон некои грешки. Проблемот е што, понекогаш, овие грешки во воспитувањето можат да ја разнишаат самодоверба на детето, па тоа се претвора во несигурна личност. Родителите имаат влијание и врз мислењето на детето за неговиот изглед, па ако не внимавате што прават и што му зборуваат, нивното дете може да порасне во личност која е убедена дека е грда.

Во продолжение погледнете за што станува збор:

Постојано го поправате изгледот на детето

Ниту едно дете не се срами од својот изглед, сè додека некој не му посочи дека нешто не е во ред. Не би требало постојано да го поправате и средувате изгледот на вашето дете, или да му кажувате работи како „покриј ги ушите со косата“ или „собери го стомакот“.

Можеби вие му мислите најдобро, но според психолозите, овие зборови дефинитивно ќе го натераат детето да го мрази својот изглед. Поради ова, тоа ќе биде срамежливо и ќе има сериозни проблеми со самодовербата.

Постојано го критикувате вашиот изглед

Децата најдобро учат од пример, па ако вие постојано се жалите кога сте пред огледало, најверојатно и вашето дете ќе го прави тоа.

Некои истражувања покажале дека девојчињата чии мајки постојано го критикувале својот изглед, особено на телото, имале поголема веројатност да развијат нарушување во исхраната.

Го критикувате изгледот на детето

Ако му велите на детето дека има „нозе како стапчиња“, дека е „подгрбавено како кифла“ или која било критика на сметка на неговиот изглед, дефинитивно ќе ја разнишате неговата самодоверба.

Немојте никогаш да го критикувате изгледот на детето и немојте никако да го споредувате со нешто друго. Ако сте загрижени за нешто, како подгрбавеност, подобро објаснете му зошто е важно да оди исправено, отколку да го навредувате.

Му велите дека вишокот килограми, брчките и слично се најужасно нешто

Некои истражувања покажале дека кај девојчињата, желбата за слабеење се појавува уште на 6-годишна возраст. Ова, се разбира, не е воопшто во ред.

Ако вашето дете има прекумерна тежина, помогнете му да се храни поздраво, но немојте да го навредувате поради дебелината.

Истовремено, ако постојано зборувате дека брчките или што било што е природно е лошо, детето ќе развие погрешна се слика за тоа како треба да изгледа.

Ги нагласувате недостатоците во изгледот на другите луѓе

Важно е да го научите детето дека не треба да ги оценува другите според изгледот, туку според однесувањето. За да успеете во ова, воздржете се од критиките кога сте со вашето дете.

Ако обрнувате внимание на туѓите недостатоци, детето не само што ќе го следи вашиот пример, туку ќе почне да ги бара тие недостатоци и кај него. А, ако ги пронајде, дефинитивно ќе си ја разниша самодовербата.

Не му давате комплименти за изгледот

Една од најголемите грешки на родителите е што не им даваат комплименти на децата. Како што вие сакате да слушнете комплимент за вашиот изглед, сака и вашето дете, особено ако се потрудило за тоа.

Немојте никогаш да штедите на комплименти за изгледот на вашето дете и додека е уште мало докажете му дека изгледа убаво. Кога ќе ве праша како изгледа, не му одговарајте „ладно“ и одвојте неколку секунди за да го пофалите неговиот изглед. Оваа ситница може да направи чуда за неговата самодоверба.

Важно е да знаете дека признанието, комплиментите и љубовта на родителите се клучни за детската самодоверба. Од сите луѓе на светот, детето најмногу ви верува вам, па што и да му кажете, засекогаш ќе остане со него. Затоа, бидете внимателни со зборовите, давајте му комплименти и научете го да се сака себеси.

Спирова С. | Црнобело