Фото-приказна: Белград низ објективот на Евгениј Хоуп

Може малку да ги оставиме настрана егзотичните острови, тиркизните мориња и песочните плажи, и така, да се вратиме во реалноста. 

 

На пример, нашите чекори да ги насочиме кон Белград, не е многу далеку од Скопје, само 450 километри. Јас лично го обожавам Белград. Ретко ми се случува да сакам да посетам еден ист град одново и одново.

Ова е град што знае да ме фасцинира и да ми раскаже уште една приказна што претходно ја немам слушнато. Ова е град град што никогаш целосно не може да се истражи.

Секоја нова уличка, зграда или премин ја продлабочуваат сликата на српската престолнина. Посебно ноќе, кога ќе исчезне метежот и џагорот на луѓето, постои еден вид на магија која како да ме спроведува во расказите на Иво Андриќ.

Белград има многу што да понуди, крстарење по Дунав и Сава, гледање на зајдисонце на тврдината Калемегдан, прошетка низ главната пешачка улица Кнез Михајлова со големиот број на згради изградени во 19. век, потоа може да се додаде и посета на подземниот комплекс на Белград, кој ќе ве доближи до историјата на главниот град во Србија, тука е и храмот Свети Сава, една од најголемите православни цркви во светот и многу други места вредни за посета.

Ако сакате зелена површина, тогаш Топчидерскиот парк е вистинскиот избор за вас, а ако вниманието ви го одвлекува храната и алкохолот, боемската улица Скадарлија е тоа што го барате.

Не би било лошо да погледнете и некоја театарска претстава во Народниот театар во Белград или да се прошетате низ книжарниците кои баш често се сретнуваат таму.

Никогаш не треба да престанете да го истражувате овој град, зошто најинтересните работи секогаш се кријат зад следниот агол.

https://www.instagram.com/p/BnHSZz-lLNi/?taken-by=evgenij.houp

Кратка фото прошетка низ Белград од поинаков агол:

Автор: Евгениј Хоуп | Црнобело