Совети за паметно пакување

Колку пати сте морале да седнете врз куферот и да се препотите додека успеете да го затворите? А колку пати дури откако сте стигнале на одмор сте сфатиле дека сте понеле премногу работи што не може да се комбинираат?

Следете ги овие совети за и ова лето залудно да не тегнете тежок куфер полн со распар облека.

1. Колку да спакувате

- Запомнете ja eдноставната формула за паметно пакување: за секој долен дел понесете три горни. Поверојатно е дека не ви пречи да ги облечете истите панталони или сукњи по неколку пати, па за секое вакво парче изберете три можни комбинации. За просечен одмор доволни се едни долги и едни кратки панталони со по три варијанти на маички или кошули и еден фустан. Изберете го она во што се чувствувате најдобро за да не го вратите необлечено.

- Доволни ви се едни патики, едни ниски сандали/апостолки и едни штикли/поелегантни чевли. Две пакувате, а со едни патувате.

- Внимателно изберете ги комбинациите на бои и не пакувајте обувки и ташни што не одговараат со облеката што ќе ја понесете.

- Не заборавајте да ги искомбинирате и работите што ги носите за секој случај. Ако залади нема да ви се најде џемпер што никогаш не би го облекле со фустанот што го спакувавте.

2. Што да спакувате

- Изберете облека што може да се носи во различни ситуации. Летото е идеално за тоа -  долгите сукњи, фустани и туники од лесни материјали може да се носат и на плажа и на ноќни забави. Понесете маички што ќе ги искомбинирате и со сукња и со шорцеви и со панталони/фармерки.

- Наместо неколку фустанчиња, понесете само едно или две и надоместете ја разноликоста со детали како накит и марами.

- Најважно е да понесете облека што не се пегла и бои или материјали на кои флеките не се познаваат и/или лесно се отстрануваат.

3. Како да пакувате

- Наместо вообичаеното диплење, пробајте да ја мотате облеката во ролни.

- Облеката од понежни материјали виткајте ја од внатрешната страна заедно со друго парче.

- Чевлите ставете ги први во делот кај тркалцата на куферот. Наполнете ги со ќесички накит или чорапи за да заштедите место.

- Над нив наредете ги другите потешки работи како полните несесери. Вака добивате стабилен куфер што нема да мора да го држите секогаш кога ќе подзастанете.

- Ако пакувате каиши испружете ги по крајот на куферот, вака зафаќаат помалку место.

- Најситните нешта оставете ги за на крај и со нив само пополнувајте ги празнините, ќошињата и џебовите на куферот.

- Потрудете се да оставите барем малку место во случај да си купите нешто што ќе треба да се спакува на враќање.

4. Не заборавајте!

- Направете си список од најважните нешта, како и од ситниците што инаку ќе треба да ги купувате таму, па проверете дали сте ги спакувале:

* Неопходните нешта како пасошот, парите/картичките, билетите и потврдата за платена резервација, очилата или леќите, апчиња за главоболка и дијареа...

* Она што сакате да го носите, а не може да го купите таму: апарат, камера, полнач за телефон и фен. Не заборавајте да земете батерии.

* Несесер: четка и паста за заби, стик/дезодоранс, ханзапласт, чешел.

* Во ташната со која ќе патувате ставете ги антибактериските марамчиња, очилата за сонце, лабело и лосион со заштитен фактор, мапа или водич за местото што го посетувате, како и точната адреса каде ќе престојувате.

* Задолжително понесете си нешто за грицкање и пиење за да се освежите по пат и не заборавајте да си земете книга.