Како црната ролка стана симбол на креативните генијалци?

Кога најмладата милијардерка во светот, Елизабет Холмс, беше обвинета за измама во рамки на нејзината компанија, не се зборуваше толку за корпоративната злоупотреба и како измамила огромен број на луѓе, колку за нејзиниот моден стил – црни јакни, панталони и црни ролки.

„Веројатно имам 150 вакви. Црните ролки се моја униформа. Така е полесно, бидејќи секој ден ја облекуваш истата работа и не мора да размислуваш за тоа,“ рече Елизабет во 2015-та година.

Таа изјава буквално им се одби од глава на многу жени кои секојдневно го имаат проблемот – што да облечам денес?

Колку и да звучи смешно, црната ролка е детаљ кој може многу да каже за личноста и нејзиниот карактер. Во неа секогаш изгледате кул, но интелигентно, како човек кој е поинаков од класичниот директор во бела кошула.

И сега се јавува логичното прашање – зошто едно толку обично парче облека успеа да „ги купи“ најголемите креативни умови на денешницата? Одговорот е – едноставност.

Привлечноста на ролката лежи во идеалниот баланс помеѓу кежуал и формален стил. Доволно е добра да се носи под сако, но и со широки фармерки.

Класичната кошула и кравата ве прават одважни и „над другите,“ додека белата маица ве прави незабележителни. Тука златна средина е токму црната ролка.

Црната ролка за првпат ја носеле во 19-ти век, претежно спортисти, работници и војници. Веќе во 20-тиот век „боемите“ и уметниците ја преземале како дел од својот стил.

Пејачот Хенри Ролинс во една прилика изјавил: „Што повеќе време поминувам прашувајќи се што да облечам, толку помалку време ми останува за да го зграпчам животот.“

Воедно, тоа е најдобриот одговор на прашањето која е тајната врска помеѓу креативците и црната ролка.

М. Д. | Црнобело