Раскошно и поетично финале: Третиот ден од Модниот Викенд во Скопје

Колорит, диверзитет, елегантни фустани, блага ексцентрика... – вака течеше третиот и последен ден од Модниот Викенд.

Како шлаг на тортата беа ревиите од:  Дренуша Џара (Косово), Јика Брада (Косово), ЈЗЈ- Златко Јовановски, Никола Петровски, Сигма jewelery,  и честа да го затвори 13-тото издание ја имаше Лидија Георгиева.

Како и претходните два дена, материјалите беа лесни и сосема соодветни за пролет и лето, најзастапени беа свилата, жоржетот и памукот. Поради силниот диверзитет на бои, не може да се каже дека постоеја доминантни бои.

Судејќи по крајот на Модниот Викенд, оваа сезона најмодерен ќе биде голиот грб, па разните типови набори и исечоци и широките ракави.

Дренуша Џара

Косовската дизајнерка работела со силни бои кои блескаа под рефлекторите. Црвената, сината, цикламата беа во центарот на вниманието. Забележливи беа фустани инспирирани од Средновековието, но сепак со нишки модерен шик. Како најдоминантни се издвојуваа долгите тоалети и кратките коктел фустани.

ЈЗЈ – Златко Јовановски

Благиот ексентристички пристап е сосема умешно скриен во совршените ремек-дела од рацете на 20-годишниот Златко Јовановски. Сакајќи да ги нагласи рамениците и колковите, тој создаде колекција од соништата на високата мода користејќи луксузни материјали како свила, тул во комбинација со монистри. Инспириран од бурлеска танчарките, колекцијата изобилува со креативни боди. Палетата на бои се движеше од златна до сребрена, бела и небесно сина.

Никола Петровски

Јубилејната 20-та годишнина на брендот, Никола Петровски ја одбележа со фантастична ревија насловена „Bacha chic“. Шармантна, боемска, исполнета со бои кои вообичаено не си одговараат како црвената и розовата. Никола Петровски е можеби единствениот дизајнер кој во својата колекција за пролет/лето го стави и ленот како еден од попријатните материјали за топлите месеци. Останувајќи доследен на себе, разните принтови беа вешто внедрени во интересни светкави материјали. А, иако не постоеше голема поврзаност меѓу парчињата, сепак колекцијата е високо кохерентна, романтична и смела.

Лидија Георгиева

Честа да го затвори 13-тото издание на Модниот Викенд ѝ припадна токму на Лидија Георгиева. „The cherry blossom collection“ e колекција која изобилува со диверзитет на материјали кои суптилно се судруваат во парче облека. Плетка, тантела, жоржет, свила - сите овие материјали го наоѓаат своето место во еден дел од облеката. Придружено со интересен танцов перформанс, колекцијата беше уникатна и несекојдневна.

Софија Сионова | Црнобело

Фото : Ани и Дими