Како сериите како „Сексот и градот“ ни го испраа мозокот?

Сериите како „Сексот и градот“ ни го разубавија животот, но делумно и ни го испраа мозокот.

Тие нè натераа да веруваме дека со работа од дома и пишување една колумна неделно, може да живеете на висока нога и без проблем да купувате чевли од $600 долари.

Тие се обидоа да нè убедат дека сè може да се истрпи за убавина и дека помеѓу изборот кој вклучува купување појадок или модно списание, вие секогаш ја бирате опцијата бр. 2.

И секако, нè убедија дека врските за една ноќ се одлични, дека отворените врски доаѓаат предвид, дека тоа е во ред дури и во вашите ’30-ти години, дека сте млади, полетни, па ослободете ја сета страст и сите забранети инхибиции, бидејќи ова е огромен милионски град, каде што на крајот на краиштата – никој не ве познава.

Погрешно.

Ако мислите дека никој не ве познава во главниот град, дека престојувате инкогнито и Скопје ќе ги скрие и испере сите ваши сексуални излети, бога ми, сите се лажеме.

Отворена врска. Спиеме, ама не сме заедно. Имаме секс, ама не сме пар. Јас можам да излезам со кого сакам, ти можеш да спиеш со уште колку сакаш...

Која е поентата, сериозно прашувам?

За секс, па еве ќе употребам и еуфемизам – за водење љубов, треба да чувствувате барем некоја емоција кон другата личност.

А отворената врска проповеда правила кои велат дека емоциите се исклучени. Дека немате право да бидете љубоморни, да запрашувате каде е, со кого е... едноставно е – тој не ви е дечко, а вие не сте негова девојка.

На крајот, сè се сведува на обичен животински инстинкт. Обично физичко искуство, празнење на нагоните. Нема бакнежи, нема длабоки погледи, нема прегратки и гушкање после тоа.

Нема заеднички појадок, ниту кафе. Нема интимни разговори, нема потенцијал за продлабочување на односот, нема просто иднина.

Апсолутно никого не осудувам за својот сексуален избор. Ако отворената врска е единствениот тип на сексуален однос кој ви одговара, одлично.

Дури малку се воодушевувам на истрајноста да се издржи таков однос. Да не ве боли срцето, да не се запрашате со уште колку девојки спие типот, да му е сеедно кога му кажувате дека некој друг ве поканил на кафе.

Да не зборувам колку е ризично од здравствен аспект доколку не практикувате заштитен однос.

Сексот е убав, сексот е одличен и треба да го има секој од нас, но по која цена?

Некој секогаш вложува повеќе во отворената врска, отколку што покажува. Некој секогаш потајно се надева дека односот магично ќе се транформира од секс во љубов.

На крајот, некој задолжително останува со скршено срце, фрлен како партал на улица и со ниска самодоверба, сметајќи дека не заслужува ништо подобро.

А вистината е дека – секој заслужува многу повеќе.

На крајот, може да се потврди само една работа:

Во отворената врска нема соголување на душата, само соголување на телото.

(O)Милена | Црнобело