Намалете ги кавгите во врската

Ставете крај на секојдневните ситни кавги со партнерот, кои ви се чини како да нема никогаш да престанат.

Не се навикнувајте на ситните несогласувања и конфликти, напротив, пронајдете начин како да ги избегнувате.

Добро познато е дека комуникацијата е онаа која што ја одржува стабилноста во врската, па затоа трудете се да вложувате во неа. Ова се неколку начини како тоа можете да го направите.

Најпрво сослушајте, па  потоа реагирајте. Слушањето е најважно, па затоа дозволете му на партнерот да се искаже, да се изјасни, без прекинување. Во афект може да се случи да кажете нешто што не сакате или пак не го мислите, само заради недоволните информации или непознавањето на ситуацијата.

Преспијте ја лутината. Обидете се да не преземате драстични мерки во екот на кавгата. Одморете, дадете си време да ги разбистрите мисли, па пото донесете заедничка одлука. 

Избегнувајте ги критиките и сарказмот. Ако нешто ви пречи, наместо да напаѓате, објаснете зошто сте повредени и лути. Почитувајте го партнерот и во ниту еден случај не му упатувајте навреди.

Бидете свесни кога треба да се извините. Немојте да се извинувате и тогаш кога не е ваша вина, но немојте ниту да се правите дека не знаете што сте направиле. Проценете самите што сте направиле, па согласно со постапката, извинете се на начин на кој мислите дека е најдостоен за вашата врска.

Поврзете се со допири. Кога ќе дојдете до ситуација од која не гледате излез, покажете ја вашата љубов. Не се штедете. Не заборавајте дека бакнежот или прегратката се одлична утеха, како и начин да покажете дека врската ја вреднувате многу повеќе од проблемот.