Што претставува данскиот концепт „pyt“ и зошто септември е одличен месец да започнете да го применувате?

Данците го сфаќаат овој концепт толку сериозно што децата во некои училишта и градинки имаат вистинско копче на кое пишува „pyt“ што треба да го притиснат кога се нервозни и вознемирени. Дали е време да го инсталирате копчето „pyt“ и во вашиот живот?

„Pyt“ обично се изразува како интерактивна реакција на секојдневни фрустрации или грешки. Може да се преведе како: „Не грижи се за тоа“, „Се случуваат такви работи“. На пример, може да се случи да скршите чаша во кујната, да ги кренете рамениците, да кажете „pyt“ и да си продолжите со дневните обврски без да се нервирате за чашата.

Односно, овој збор се користи во ситуации кога нешто ни е надвор од контрола, свесни сме дека тоа нè фрустрира, но наместо непотребно да трошиме енергија на прекумерно размислување за тоа - продолжуваме понатаму.

Суштината е прифаќање и преминување кон нешто попродуктивно, се разбира само ако навистина не можеме ништо да направиме за тоа.

Зошто овој концепт треба да почнете да го практикувате овој септември?

Кога мислиме на септември, го споредуваме со нови почетоци и овој месец ни носи чувство на исчекување. Кога бевме помали, септември навистина претставуваше почеток на новата учебна година и ново поглавје во нашиот живот кое носи многу предизвици.

Сега, можеби многумина од нас не започнуваат нова учебна година (освен учениците и учителите), но септември е месец на нова есен, а со тоа и време за нови промени. Сето ова често нè тера да сакаме да се посветиме на ново хоби, да патуваме на место што досега не сме го посетиле или да започнеме нов проект.

Понекогаш од таква потреба реагираме набрзина и по секоја цена сакаме да започнеме нешто ново, но можеби е време да го следиме примерот на Данците и да го искористиме нивниот концепт за поинаков вид ресетирање и да размислиме смирено пред да започнеме нешто.

Оваа потреба за освежување, ресетирање и промена обично доаѓа од потсвесното незадоволство од нашата моментална состојба на животот, па затоа е и начин на преиспитување на нашите приоритети и цели.

Можеби се прашувате зошто во оваа работа треба да се осврнеме на Данците, а одговорот лежи некаде во фактот дека тие со години се на врвот на најсреќните нации во светот и очигледно прават нешто како што треба. Па, дали е време да го инсталирате копчето „pyt“ и во вашиот живот?

M. Г. | Црнобело / фото: freepik.com