Во Виетнам нема никакви прослави и уште 7 држави со интересни роденденски обичаи и традиции

Повеќето од нас едвај чекаме да ни дојде роденден. Овој ден е само наш, сите ни честитаат и се однесуваат добро со нас, а голема е веројатноста и да добиеме некој подарок, особено ако сме организирале прослава.

Но и покрај тоа што сите луѓе на светот имаат роденден, традициите и обичаите за нивното прославување се многу различни – на некои места не се ни прославува.

Погледнете како се прославуваат родендените во осум држави ширум светот:

Германија

Никогаш немојте да честитате роденден или да давате роденденски подароци некој ден порано – во Германија се верува дека ова носи лоша среќа.

Ако, пак, бидете поканети на роденденска забава, слично како кај нас, славеникот мора да плати за сè.

Во Германија постојат и неколку забавни роденденски традиции што останале од порано. Ако некој наполни 16 години, може да очекува пријателите да му истурат брашно врз главата. 

А, ако славеникот полни 30 години и не е во брак, пријателите можат да го натераат да чисти некое јавно место. Ова го практикуваат само мажите и наводно целта е за славеникот да се покаже како „домаќин“ за полесно да си најде партнерка.

Кина

Кога станува збор за родендени, во Кина најинтересен е начинот на којшто ги бројат годините. Кога таму ќе се роди дете, на денот на раѓањето се смета дека тоа има една година. Кога полни една година, таму се смета за втора.

Овде има и интересна традиција според која се одредува иднината или судбината на детето. На вториот роденден (или по наше првиот) околу бебето се ставаат разни предмети како пари, музички инструмент, пенкало… Според верувањата, предметот што ќе го одбере детето ја означува неговата професија и неговиот живот во иднина.

За разлика од Германија, во Кина можете да го прославите роденденот порано, но никако откако ќе ви помине – ова се смета за лоша среќа.

Австралија

Роденденските прослави во Австралија се многу слични со нашите, но наместо тортата, многу поважен е десертот познат како fairy bread. Ова е всушност парче леб премачкано со путер и наросено со шарени трошки.

Во Австрлија верува дека кога личноста ќе наполни 21 година станува возрасна, па овој роденден е многу важен и скоро сите добиваат вредни подароци, неретко автомобили и куќи.

Холандија

Холанѓаните ги сакаат роденденските подароци, но никако не смеете да им подарите пари. Ова го сметаат за неучтиво.

Истовремено, кога некој слави роденден, ќе треба да им честитате и на родителите, партнерот, роднините… односно сите присутни од семејството. Сепак, тоа е и прослава за нив.

Франција

Освен ако не станува збор за важен роденден, како 18-ти или 100-ти, Французите ја прескокнуваат роденденската торта и прославуваат со „пообичен“ десерт.

Роденденските забави за деца најчесто се организираат во среда или сабота попладне. Сепак, бидејќи сабота е најчесто семеен ден, повеќето забави се организираат во среда.

На овие прослави нема многу храна, туку само нешто за мезење, а родителите не присуствуваат на нив. Освен, се разбира, родителите на славеникот.

Мексико

Во Мексико постои верување дека личноста која прва ќе добие парче торта од славеникот може да ја следи несреќа.

Кога, пак, на славеникот ќе му ја испеат роденденската песна, тој не си сече парче, туку треба да гризне од целата торта.

На мексиканските прослави доста популарна е и таканаречената пињата – кутија, најчесто во форма на животно или некој популарен лик, полна со чоколатца и бонбони која се закачува на нешто.

Потоа на славеникот му се врзуваат очите и тој со стап треба да ја удри за да ги „ослободи“ слатките.

Јамајка

Ако ви е роденден во Јамајка, подгответе се да ви фрлат брашно во лицето. Брашното најчесто го фрлаат за време на прославата, но неретко пријателите и семејствата сакаат да ги изненадат славениците и да ги посипат неочекувано.

Виетнам

Роденденските прослави во Виетнам се вистинска реткост. Жителите не се многу заинтересирани за нивните датуми на раѓање и обично сите прослави ги прославуваат на нивниот празник Тет, кој се празнува околу Нова година.

Спирова С. | Црнобело