Прегрнете ги саканите во дом за стари лица - прегратки без ризик од зараза (фото)

Во еден дом за старечки лица во Шефилд смислиле одлично решение за оние кои сакаат да ги посетат своите најмили, но не сакаат да ги изложат на ризик од корона вирус.

Нивниот изум не само што им дозволува на посетителите да разговараат со нивните сакани, туку им овозможува и да споделат прегратка, без да ризикуваат да ги заразат или да бидат заразени од вирусот.

Во домот направиле посебна просторија за посети, во која инсталирале стаклени прегради на кои се поставени гумени ракавици со кои посетителите и нивните роднини или пријатели можат да се допрат на безбеден начин.

Околу една недела откако ги поставиле гумените ракавици, од домот споделиле дека веднаш забележале позитивна промена во расположението на луѓето кои престојуваат кај нив.

„Помина една недела откако го направивме новото место за посети. Топло е, безбедно и нуди дистанца, а покрај тоа додадовме и гумени ракавици што им овозможуваат на луѓето кои престојуваат кај нас да ги прегрнат нивните семејства и да се држат за рака на безбеден начин. Просторијата се дезинфицира после секоја посета“, напишале од домот, споделувајќи неколку прекрасни фотографии од средбите во новата соба за посети.

Од фотографиите и самите ќе забележите дека овој новитет во домот навистина има позитивно влијание врз старите лица.

Новата просторија во домот Hallamshire се користи веќе еден месец, а вработените велат дека имале само позитивни искуства.

Бидејќи постарите лица со хронични болести се една од ризичните групи кога станува збор за корона вирусот, овој изум е одличен начин да ги видат своите сакани без да стравуваат за нивното здравје.

Спирова С. | Црнобело