Психијатар исплете детална реплика на човечкиот мозок

Човековиот мозок често е опишуван како сложена мрежа на нервни клетки, односно неврони, кои ги има барем една милијарда кај секој човек.

Секој еден неврон „контактира“ со уште илјадници други и тоа само во орган кој тежи во просек 1,2-1,4 килограми. Овие конекции постојано се менуваат и прилагодуваат на тоа што го учиме и знаеме, а потоа работат „персонализирано“ за личноста.

Психијатарот доктор Карен Норберг работи во Националното биро за економски истражувања на Кембриџ. Таа неколку години плетела неверојатна и целосно анатомски точна реплика на мозокот. Со помош на памучен конец таа ги исплела сите важни делови од мозокот. На пример, фронталниот кортекс е исплетен со крем нијанса и бледо зелена, визуелниот кортекс со сина, виолетова и тиркизна, а хипокампусот од бебешко розов конец.

Двете страни се поврзани со патент, а малиот мозок и дел од 'рбетниот мозок се претставени со син конец и долг „прамен“ од памук.

Овој проект иако е завршен уште во 1994, денеска се наоѓа во домот на Норберг, а претходно бил дел од постојаната поставка на Научниот музеј во Бостон.

Е. Д. | Црнобело