Џ. К. Роулинг испрати книги за девојче во Сирија за читајќи да заборави на војната

Бана Алабед и нејзината мајка живеат во Алепо, еден од сириските градови каде војната нанесе огромни штети не само врз инфраструктурата на градот, туку и врз животите на луѓето.

Малечката Бана имала можност да го гледа филмот за Хари Потер, а кога дознала дека постојат повеќе книги според кои се снимени филмовите сакала и да ги прочита.

За да и ја исполни желбата, нејзината мајка се обратила до Твитер заедницата со прашање како може да ги добие книгите за нејзината ќерка.

Профилот кој собрал повеќе од 94 илјади следбеници стигнал и до Ј.К. Роулинг, која веднаш се погрижила малечката Бана да добие електронска верзија од сите книги за Хари Потер, пишувајќи „Се надевам дека ќе ги прочиташ сите книги бидејќи сигурна сум дека ќе ти се допаднат.“

По добивањето на книгите мајката објавила фотографија од девојчето, со зборовите „Ти благодарам многу за книгите, пријателке Џ.К. Роулинг. Сè најубаво, од Алепо“.

Можеби најтрогателните зборови со кои мајката ја опишува љубовта на својата ќеркичка кон книгите се - „Чита за да заборави на војната“.

М. С. | Црнобело