Строги правила што треба да ги следат гостите на Мет гала

Телефоните се строго забранети, гостите не смеат да ја одбијат поканата – во спротивно, никогаш повеќе нема да бидат поканети. Кои други правила ги следат гостите на престижниот настан?

Мет галата е можеби најважниот настан во модната индустрија кој се одржува секоја година во музејот Метрополитен во Њујорк.

Со настанот се одбележува отоврањето на годишната модна изложба на Институтот за костуми во музејот, а на свеченоста присуствуваат некои од најпознатите и најмоќните луѓе во светот.

На настанот може да присуствуваат само оние што добиле покана, а притоа треба да следат неколку строги правила.

Дел од нив во продолжение:

Не смеат да внесуваат телефони

Телефоните не биле проблем на Мет галата, сè до појавата на уредите со камера. Всушност, настанот е обвиен со мистерија бидејќи никој од присутните не смее да фотографира.

Забраната за телефони важи од 2015 година, по наредба на Ана Винтур. Сепак, повремено некои гости го прекршуваат правилото.

„Користењето телефони за фотографирање нема да биде дозволено на галата. Причината за ова е безбедноста и уживањето на гостите“, имаат изјавено организаторите.

Нормално, од настанот има фотографии, но направени се од професионални фотографи кои се најмени за таа цел.

Гостите мора да седат на местото назначено за нив

Секој поканет гостин има точно одредено место на коешто треба да седи и не смее да го промени, наводно бидејќи организаторите вложуваат многу време во планирањето на распоредот.

Според еден од организаторите на настанот, цел тим работи на распоредот на седење уште од декември, а настанот се одржува во мај.

„Според нас, идеално е еден до друг да седат луѓе кои се слични, но самите можеби не сфаќаат дека имаат многу заеднички работи.

За секоја личност што ја каниме, размислуваме за што би можела да разговара на настанот“.

Забранета е одредена храна

Ана Винтур е главниот организатор на настанот уште од 1995 година и очигледно внимава и на најмалите ситници.

Па така, гостите не смеат да јадат храна како кромид и лук бидејќи предизвикува лош здив.

Наводно, главната уредничка на Vogue поставила забрана и за служење магдонос бидејќи постоела „опасност“ на некој да му остане парче на забите.

Според некои извори, и самите гости се толку загрижени за тоа дали ќе им мириса здивот, што воопшто не ни јаделе на настанот, без разлика што им се служат неколку луксузни оброци.

Пушењето е строго забрането

Очигледно, пушењето во музејот Метрополитен е забрането, но гостите не смеат да пушат и надвор од музејот.

А, ако некој од гостите го прекрши правилото, може да биде избркан и никогаш повеќе да не добие покана за настанот.

Сепак, низ годините се појавиле неколку фотки од познати личности кои се криеле во тоалетот за да запалат цигара.

Гостите мораат да го почитуваат дрес кодот

Како што спомнавме, со Мет галата се одбележува отворањето на изложбата на костуми во музејот. А, темата на изложбата ја диктира и темата на Мет галата.

На пример, во 2023 година изложбата беше во чест на Карл Лагерфелд и беа изложени негови креации. Па, гостите носеа креации инспирирани од него.

Интересно е што Ана Винтур лично гледа дел од креациите што ќе ги носат гостите.

Нормално, нема време да ги провери сите, но доколку не ѝ се допаѓа нешто или смета дека не е соодветно на темата, може да побара од гостинот да се појави со нешто друго.

Гостите не смеат да ги допираат изложените експонати

Креациите и експонатите што се изложуваат во музејот се скапи, а имаат и историска вредност.

Така што, гостите можат да ги разгледуваат, но никако не смеат да ги допрат.

Ако некој допре што било, може да биде избркан од настанот.

Продолжува на следната страница...