Просечна висина е 181cm, на мажите им прават лузни - Факти за највисокото африканско племе Динка

Тие се најголемото племе во Јужен Судан, но и највисокиот народ во цела Африка.

Народот Динка е етничка група од Јужен Судан која брои неколку милиони луѓе. Поголемиот дел од овие луѓе живеат покрај реката Нил и се занимаваат со сточарство.

Нивниот начин на живот нема скоро никаков допир со модерното општество на коешто сме навикнати, но токму ова го прави Динка народот уникатен и посебен.

Овие луѓе си имаат свои верувања и традиции, свои правила на живот и филозофии и навистина живеат многу поразлично од што можеме и да си замислиме.

Во продолжение неколку забавни факти за нив:

Тие се највисоките луѓе во Африка

Заедно со уште едно племе од Руанда, народот Динка се смета за највисокиот во Африка. Според мерења од 1950-тите, просечната висина на мажите била 182,6 сантиметри, а на жените – 181,3 сантиметри.

За жал, понови податоци покажуваат дека просечната висина на народот Динка се намалува – според мерења од 1995 година, овој број изнесувал 176 сантиметри.

Експертите сметаат дека причината за ова намалување е неисхранетост, како и многуте воени конфликти на местата каде што живеат овие луѓе.

Најверојатно за нивната висина е одговорна исхраната

Постојат многу теории за тоа зошто Динка народот е толку висок, а повеќето експерти се согласуваат дека причината е нивната исхрана. Овие луѓе претежно јадат органска храна и млеко.

Сепак, некои експерти сметаат дека станува збор само за гени, бидејќи околу нив имало и други народи со генерално иста исхрана, а кои не се толку високи.

Еден од највисоките кошаркари во светот потекнува од племето Динка

Со висина од 2,31 метар, Мануте Бол е еден од највисоките кошаркари во историјата на спортот. Тој е роден во 1962 година во Судан, а неговиот татко бил поглавар на едно од племињата на Динка народот.

Мануте почина во 2010 година.

Тие се најголемото етничко племе во Јужен Судан

Според податоци од 2008 година, Динка народот го сочинуваат околу 4,5 милиони луѓе, а тоа го први најголемата етничка група во Јужен Судан.

Тие се поделени на многу независни групи, или племиња со по 1.000-30.000 луѓе.

Групите можат да имаат различни религиски верувања

Иако разните групи можат да имаат различни религиски верувања, повеќето се монотеисти и веруваат во богот Nhialic. Според Динка народот, нивниот бог привремено ги опседнува телата на луѓето за да зборува преку нив.

Еден од главните религиски ритуали е принесување жртва на нивниот бог, најчесто вол.

Интересно е што Динка народот не се моли на идоли или слика од нивниот бог, туку се свртува кон природата. Според нив, божествената моќ не доаѓа од тотеми, туку од самата природа.

Машките деца си прават лузни на челото кога „стануваат мажи“

Во некои групи на Динка народот, кога машките деца ќе стигнат одредена возраст, се прави посебен ритуал со кој се означува мигот кога стануваат мажи.

На машките деца им се прават засеци на целото со остар предмет кои потоа им оставаат лузни.

Наводно, некогаш и жените си прават вакви лузни.

Главна „професија“ им е одгледувањето крави

Динка народот е најпознат по одгледувањето крави и ова е нивното главно занимање.

Некои групи се и еден вид номади, односно заедно со добитокот се преселуваат на друго место во одредени сезони.

Околу месец мај, кога почнува дождовната сезона, тие се во нивните постојани живеалишта. Кога почнуваат сушите, околу декември, целото племе - освен многу старите, болните и мајките со бебиња - се упатуваат кон привремени живеалишта каде што има доволно храна за добитокот.

Покрај сточарството, тие се занимаваат и со агрикултура.

Политиката не постои за нив

Како што напоменавме, Динка народот е поделен на многу независни, но обично поврзани групи, односно кланови. Тие немаат главен лидер, но некои од клановите имаат поглавар.

Овој поглавар нема апсолутна моќ и само некогаш може да истапи како лидер на кланот. Оваа функција е наследна, но не секогаш.

Спирова С. | Црнобело