„Незгодни луѓе овие жениве“ - Бесмртни цитати на Михаил Булгаков

Се навршија 125 години од раѓањето на интригантниот Булгаков, руски писател и драматург, чие најпознато дело „Мајсторот и Маргарита“ (о)станува безобразно успешно, трн во окото на оние кои долги години ја забранувале работата на овој автор.

Оковите на цензурата, сепак, не го спречиле Михаил да пишува и да твори, ниту ја секнале неговата згаденост од општеството во кое живеел и режимот кој го задушувал, а тој му одвраќал со храбро исмевање.

Историјата вели дека имал судир лично со Сталин, а желбата да ја заврши приказната на Мајсторот и Маргарита се граничела со опсесија. Не го спречила ниту болеста да ја диктира нарацијата на романот, дури и од постелата во која боледувал.

Неговите дела се комплексни, повеќеслојни, крајно луцидни, исткаени со сатира, мајсторски раскажани. Булкагов е еден од оние автори кои ја маѓепсуваат публиката и секогаш ќе бидете гладни за уште, без разлика дали ја читате „Песјо срце“, „Записи на младиот лекар“, „Ѓаволијада“ или „Кобни јајца“.

Едноставно е, ако му дадете шанса на Булгаков, огромна е веројатноста дека ќе бидете лесно заведени и засекогаш вплеткани во неговиот фантастично-сатиричен книжевен опус.

Ѕирнете во неговиот ум, преку овие 10 бесмртни цитати:

1. Удри го човека по носот, турни старец надолу по скалите, пукај во некого или некоја друга слична старомодна работа, тоа е мојата задача. Но, расправија со жената која ја љубиш – не, благодарам.

2. Ничија судбина не е во твој интерес, освен твојата сопствена.

3. Незгодни луѓе, овие жениве.

4. Кој ви кажа дека на светот не постои вистинска, искрена и вечна љубов? Нека му се исече јазикот на подлиот лажго.

5. Ракописите не горат.

6. Кукавичлукот е најголемиот грев.

7. Кучешкиот дух умира тешко.

8. Не постои поголема несреќа на светот од губењето на умот.

9. Да се зборува вистината е лесно и пријатно.

10. Тој почна да сфаќа дека не може да исправи ништо во својот живот, туку само да заборави.

(О)Милена | Црнобело