Имало нудистички плажи, населен е барем 7.000 години - Забавни факти за Скопје

Скопскиот градски парк датира од почетокот на 19-ти век

Паркот во срцето на градот е едно од омилените места на скопјани.

Дебелите сенки, патеката долж Вардар, легендарната Школка со многу настани и концерти, Зоолошката градина на самиот влез во паркот, некогашниот Лунапарк, летните дискотеки и кафулињата се само мал дел од причините зошто го сакаме паркот. Паркот секогаш е полн, преку ден врева, а навечер смеа, гитара и песна од тинејџерите на „сепариња“.

Интересен факт е што нашето омилено катче во градот датира уште од почетокот на 19-ти век.

Пред сто години, во 1923 година, австриски парковски градинар го проширува паркот кон Зоолошката градина. Во следните години паркот постојано е уредуван, прошируван и збогатуван со флора и фауна.

Својот денешен лик и површина, паркот ги добива во 1970 година.

Денешнатa површина која го зазема паркoт е 486,000m² и се простира помеѓу улицата Ленинова од исток, Булевар „Октомвриска револуција“ од запад, реката Вардар од север и Булевар „Илинден“ од југ.

Во Скопје животот континуирано трае најмалку 7000 – 8000 години

Неолитската тумба во Маџари, неолитската тумба во Чаир и неолитската населба на Скопската тврдина се докази дека животот во Скопје континуирано трае најмалку 7000 - 8000 години.

Тумба е археолошко наоѓалиште во скопската населба Маџари. Претставува населба од неолитското време, односно од 6-ти милениум пред нашата ера. Од археолошките откритија најзначајна е фигурата на Големата Мајка – заштитничката на плодноста.

Кустосот е секогаш спремен да ви го покаже локалитетот и да ве однесе во времето на праисторијата.

Во Скопје е родена Мајка Тереза

Родена како Агнеса Бојаџиу во центарот на Скопје, Мајка Тереза својот живот го посветила помагајќи на болните и сиромашните.

Куќата во која е родена Мајка Тереза е уништена од катастрофалниот земјотрес кој го погоди Скопје во 1963 година. Нејзиниот дом, кој денес е споменик и музеј, се наоѓа на тогашната улица „Поп Кочина“ број 14, сегашниот плоштад Македонија во Скопје.

Таа била најмалото дете во семејството.

Мајка Тереза, позната и како Света Тереза од Калкута, е родена на 26 август 1910, а починала во Калкута на 5 септември 1997.

Таа била католичка калуѓерка, добитничка на Нобелова награда за мир и светица во католичкиот свет.

Античкото име на Скопје е Скупи

Градот низ историјата сменил неколку имиња. Неговото античко име е Скупи, во византиските документи е запишан како Скопија, а Словените го нарекувале Скопје, Скопие и Скопље.

За време на владеењето на цар Самуил, Скопје станува дел од Самоиловото Царство. Во подоцнежниот период градот потпаѓа под власт на Византија, Бугарија и Србија, а на 19 јануари 1392 градот го зазеле Османлиите и го добил името Ускуп (Üsküp).

Името на градот Скопје има различна транскрипција на различни јазици и култури. Градот е познат како Shkupi (Шкупи) на албански, Скопље/Skoplje на српски/хрватски јазик, Scupi (Скупи) на латински, Скопье на руски, Skopiye (Скопије) на ромски, Σκόπια (Скопиа) на грчки, Skopje на романски јазик, Üsküp (Ускуп) на турски.

Богородица е заштитничка на градот

Празникот Успение на Пресвета Богородица е еден од дванаесетте најголеми христијански празници, посветен на денот кога таа се преселила на небото.

Богородица се смета за заштитничка на сите христијани и на градот Скопје.

Покрај овие десет интересни факти, Скопје исто така е дом на првата зоолошка градина на Балканот. Пештерата Врело лоцирана на кањонот Матка се смета за најдлабока пештера на Балканот, а втора најдлабока во Европа.

Салоника – Скопје е првата железничка пруга која е изградена во 19-от век.

Македонија и Скопје можеби територијално се мали, но тоа не значи дека не се богати со историски факти со огромно значење и природни и ретки богатства.

©CRNOBELO.com Забрането преземање и копирање. Крадењето на авторски текстови е казниво со закон.

И. Ј.| Црнобело / фото: depositphotos.com