Реалност во скопска фирма: Еден кандидат дојде на интервју во тренерки, другиот си зборуваше на телефон – што мислите, кој се вработи?

Колку е важен првиот впечаток? Ако зборуваме генерално, вистината е дека тој е навистина важен и како што велат „нема втора шанса за прв впечаток“.

Тука не зборуваме за тоа дали некој е облечен во скапа и брендирана облека, туку за тоа кој како се однесува и се труди да изгледа уредно.

Во секојдневниот живот, на сите може да ни се случи да „утнеме“ поради лош ден, брзање при спремање и да оставиме впечаток на некултурна, несредена и неодговорна личност.

Но, дали тоа може да си го дозволиме на интервју за работа?

Во нашата фирма пуштивме оглас за вработување на лице во IT секторот.

Стигнаа многу биографии и по неколкучасовна селекција, одбравме кандидати кои ги викнавме на интервју.

Двајца кандидати навистина ми оставија впечаток и оттука се инспирирав да ја отворам темата со оставањето на првиот впечаток.

Едниот кандидат, кој имаше извонредно портфолио и кој во нашите глави го замисливме како навистина голем IT експерт, дојде на првото интервју облечен во тренерки и патики.

Тренерки и патики! Ова го пишувам, затоа што во мојата 13-годишна кариера, сѐ уште не сум сретнала лик кој доаѓа на интервју облечен како да оди на трчање.

Ме фаќа смеа и додека го пишувам ова, зашто после разговорот, колегите ме имитираа каква фаца сум направила.

Искрено, не се мешам во изборот на гардероба на вработените, но сепак мора да се има некое ниво на облекување, во локален маркет се трудат да се облекуваат соодветно, а камо ли во фирма, со канцелариска работа.

Колку треба да не се оптеретуваш, за да се појавиш така на интервју за работа?

Типот беше врв, очигледно стручен, опуштен, комуникативен, сè си беше во ред, ама мене погледот ми беше во неговите патики и дуксерчето.

Кодекс на облекување и однесување е основно нешто, првиот впечаток, па дури и начинот на ракување или контактот со очи знае да пресуди за или против некој кандидат.

Другиот кандидат, кој беше облечен соодветно за интервју, пред да влезе доби важен повик, си седна и на сите ни гестикулираше со показалецот на уста да молчиме додека дозбори.

Неверојатно. Од култура го поминавме интервјуто со него, но секако не дојде во обѕир да го вработиме.

Мојата проценка беше дека типот со тренерките и патиките покажа повеќе почит и верувале или не, го примивме.

Кај нас е 8 месеци и одлично се снајде. Откако доволно се зближивме, му објаснивме за кодексот на облекување - патики си носи пак, ама барем не е во тренерки.

Имаше среќа што и покрај наметнатиот притисок од општеството, сепак не потпаднавме под влијание на првиот впечаток за изгледот да ни биде повеќе релевантен отколку неговата професионална компетенција.

Ама во секоја прилика го задеваме за тренерките и за лабавиот пристап на интервјуто.

Наравоучение: Секогаш трудете се да бидете облечени соодветно за на интервју, зашто не секој работодавач е способен да се „избори“ со предрасудите за изгледот или со вашата оригиналност и автентичност во стилот на облекување.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

Кара | Црнобело