Подгответе се за патување: Првиот вселенски хотел ќе биде отворен во 2025-та година

Неодамна, фондацијата Gateway најави дека планира да го направи првиот вселенски хотел до 2025-та година. Наводно, хотелот ќе може да сместува и до 100 туристи неделно.

Вселенската станица ќе биде наречена Вон Браун, по контроверзниот научник Вернер вон Браун кој на почетокот од кариерата беше вмешан со нацистичката партија.

Подоцна тој беше директор на центарот за вселенски летови Маршал на НАСА. Станицата ќе биде монтирана во вселената со помош на роботи и дронови.

Дизајнот на хотелот е дело на Тим Алаторе, кој пак црпел инспирација од концептите на вон Браун од 1950-тите. Станицата ќе биде во форма на огромно тркало, со дијаметар од 189 метри и ќе се врти бавно за да генерира гравитациона сила.

Станицата ќе ја сочинуваат приватни станови, но и хотелски соби и посебни простории за екипажот. Неколку простории ќе бидат продадени и на власти како центри за истражување.

Бидејќи ова ќе биде место за одмор, гостите ќе можат да уживаат во барови, ресторани, па дури и теретана. Се очекува станицата да има околу 400 постојани „жители“ кои навистина ќе се чувствуваат како дома.

Хотелот ќе стимулира лунарна гравитација, а ова ќе биде првата ваква станица со вештачка гравитација.

Доста внимание се обрнало и на ентериерот, а дизајнерите го избегнале „футуристичкиот“ изглед и се обиделе да направат потопла атмосфера.

Ова е навистина возбудил период за вселенското патување, а организациите како Gateway и SpaceX бараат начин да го направат достапно за сите.

Спирова С. | Црнобело