Сестричката го носеше на раце, а сега се гордее – момчето со рак од виралната фотка конечно се излечи

Детали

вторник, 05 октомври 2021

Фотографијата на која 5-годишната Обри го галеше по грбот тогаш 4-годишниот Бекет кој боледуваше од леукемија, стана вирална, а сега мајката соопшти дека малото момче е излекувано.

Во септември 2019-тата година Кејтлин Бурџ од Тексас сподели фотографија како нејзината 5-годишна ќерка Обри се грижи за 4-годишното братче Бекет што тогаш боледуваше од леукемија.

Болеста била за првпат дијагностицирана кога Бекет имал само две години, откако претходно имал инфекција на увото. По ова поминал неколку месеци во болница и бил лекуван со хемотерапија.

„Неговата болест почна преку ноќ со инфекција на увото. Немаше никакви симптоми што укажуваа на тоа дека тој боледува од леукемија“ – вели таа.

Пред две години фотографијата на која се гледаше како тогаш 5-годишната Обри го охрабрува нејзиното помало братче додека ги трпи последиците од хемотерапијата стана вирална.

Мајката тогаш сподели дека нејзината ќерка понекогаш и го носела во раце своето мало братче и го ставала на каучот, кога тој бил мошне слаб и не можел да оди сам.

Кејтлин која има уште една помала ќерка, вели дека во 2019-тата одлучила да ја објави застрашувачката фотографија за да покаже колку е важно семејството во тешките мигови од животот, а тврди дека поради болеста, Обри и Бекет денес се мошне блиски.

„Обри имаше толку големо влијание и му помогна да се избори со болеста. Тие развија таква поврзаност, што ниту јас како мајка не можам да ја заменам.

Додека тој беше на хемотерапија таа му беше втора мајка, но сега со оглед на тоа што повеќе не е на терапија, тој сака да биде повеќе независен. Нејзе тоа ѝ паѓа мошне тешко“ – вели Кејтлин.

По двегодишна тешка битка со злокобната болест, во август годинава малиот Бекет конечно престанал со терапиите.

Сега по две години, Кејтлин вели дека Бекет е излекуван и се вратил во училиште. Тој и неговата сестра Обри се мошне блиски, но, иако ретко, сепак понекогаш и се расправаат.

За мајката ваквите расправии пак значат дека по тешката борба со злокобната болест, животот, полека, но, сигурно се враќа во нормала.

Погледнете уште неколку фотографии од малиот Бекет:

Б. С. Б. | Црнобело