Семејство од Сардинија најстаро на светот

Детали

среда, 22 август 2012

Семејството Мелис од Сардинија е најстарото на светот, поточно деветте браќа и сестри имаат вкупно 818 години, а најстарата од нив има 105 години, што претставува рекорд потврден во Гинисовата книга на рекорди.

Според локалниот весник Unione Sarda, по седум години истражување на петте континенти, претставиците на Гинис потврдиле дека семејството Мелис е најстарото, според возраста на неговите членови, на светот.

Семејството потекнува од местото Пердасдефоѓа во регионот Ољиаста во централниот дел на островот Сардинија.

На 1-ви април 2012 година, деветте браќа и сестри имале вкупно 818 години и 205 дена. Најстарата, Консолата којашто има девет деца, 24 внуци, 25 правнуци и тројца праправнуци, во среда на 22-ри август ќе го прослави 105-от роденден.

По неа следи 99-годишната Клаудија, којашто е во форма и во понеделникот била во првиот ред на мисата, пишува Unione Sarda.

Потоа следат 97-годишната Марија која од неодамна има здравствени проблеми, 93-годишниот Антонио и 91-годишната Кончета, а 89-годишниот Адолфо сѐ уште работи во неговото кафуле во Пердасдефоѓа.

22.08.2012 (Макфакс)