Ледениот човек Вим Хоф се соочува со тужби: „Ќерка ми умре бидејќи го проба неговиот метод - влегување во студена вода“

Кели Пул се запишала на работилница во компанијата Breatheolution која станала многу популарна во САД.

На веб-сајтот на компанијата било истакнато дека се користат техниките на Вим Хоф, како и други вежби за дишење.

39-годишната Кели Пул била дел од вежба во која под водство на тренер, правела вежби за дишење, вклучувајќи и задржување на воздухот.

По вежбите, Кели и другите кои учествувале во сеансата влегле во студена вода.

Наводно, Кели се пожалила на главоболка, по што изгубила свест.

Некој од групата ја извлекол од водата и пробал да ја разбуди, но Кели починала веднаш.

Подоцна аутопсијата покажала дека Кели имала недијагностициран проблем со срцето, кој најверојатно се влошил поради студената вода.

Мајката на Кели ја споделила приказната со надеж дека ќе ги натера другите да бидат повнимателни.

„Знам дека станува збор за недијагностициран проблем со срцето и никој не би можел да ја спаси.

Но, без соодветна регулација, секој може да ти рече ’дај ми 100 евра за да влезеш во студена вода‘.

За Кели е предоцна, но можеби ќе се спаси некој друг“.

Местото каде што починала Кели

Меделин Мецгер, исто така од САД, е уште една девојка која починала од слична техника.

Според татко ѝ, 17-годишната девојка се удавила во семејниот базен, откако пробала да изведе техника на Вим Хоф.

Повторно, Ледениот човек не бил присутен и таа веројатно ја пробувала техниката без никакво водство.

Но, татко ѝ смета дека најголем виновник е Вим Хоф бидејќи промовира совети и опасни методи на Инстаграм.

Семејството на младата девојка поднесе и тужба против Вим Хоф и неговата компанија и покрај сумата од над 60 милиони евра, бара и забрана за работа.

Вим Хоф се има огласено за тужбата преку адвокати, истакнувајќи дека секогаш предупредува за опасностите на техниките.

Тој вели и дека не препорачува некој да ги пробува техниките без водство и да не оди кај тренер кој нема никаква врска со него.

На веб-сајтот на Вим Хоф, исто така е нагласено дека ако некој има каков било проблем со здравјето, како висок крвен притисок или проблеми со срцето, никако да не ги пробува техниките.

„Важно е да нагласам дека не препорачуваме да ги пробувате методите на Вим Хоф ако имате одредени проблеми со здравјето и препорачуваме да се консултирате со лекар“, има изјавено синот на Ледениот човек.

Спирова С. | Црнобело