Емотивна исповед на мајка: „Како да им објаснам на децата дека немам пари за подароци како од Инстаграм?“

Детали

петок, 29 декември 2023

„Работите што ги гледате на социјалните мрежи создаваат притисок врз луѓето и си помислувате: ‘Да, можам и јас да го направам тоа за моите деца’. Никој не покажува колку е тешко“ – вели млада мајка од Англија која доби поддршка од голем број родители кои тврдат дека празниците создаваат огромни финансиски трошоци, што тие сами едвај успеваат да ги подмират.

Божиќните и новогодишните празници се најубавиот период од годината, но мора да се признае дека за некои луѓе претставуваат вистински кошмар затоа што купувањето подароци и подготвувањето храна може да претставува огромен товар врз семејниот буџет.

Даниеле (32) е мајка од Англија, која на социјалните мрежи објави видео во кое со солзи во очите раскажува како се чувствува виновна затоа што не е во можност на своите деца да им обезбеди подароци како голем број други родители.

Таа раскажува како заминала во познат маркет во Англија за да купи основни работи за домот и подароци за децата, но кога стигнала на каса – следувал шок, нејзината картичка била одбиена.

„Одлучив да проверам што се случува со мојата сметка и сфатив дека веќе немам пари, затоа што банката повлекла пари за хипотеката, а компанијата за електродистрибуција предвреме ми ја наплатила сметката“ – вели таа.

Даниеле вели дека со големото зголемување на цените, таа и нејзиниот партнер во моментов се во можност само да ги платат долговите и им остануваат многу малку пари за живот.

„Ги гледате сите оние видеа на социјалните мрежи, како родителите им даваат на децата прекрасни кутии со подароци и одат да се сликаат со Дедо Мраз и сакам и јас да го направам тоа, но кога ќе дојдат сметките, сфаќам дека немам пари за ништо“ – вели таа.

„Работите што ги гледате на социјалните мрежи создаваат притисок врз луѓето и си помислувате: ‘Да, можам и јас да го направам тоа за моите деца’.

Никој не покажува колку е тешко и дека родителите се чувствуваат виновни кога сакаат на своите деца да им дадат скапи подароци, а не можат. Кога децата ќе ти речат: ‘Моите пријатели беа да го видат Дедо Мраз и правеле ова или она’, како да им објасните дека вие не можете да си го дозволите тоа?“

Даниеле доби голема поддршка од повеќе родители кои исто така признаа дека се соочуваат со слична ситуација и дека ретко кој зборува за финансискиот притисок што го трпат родителите за време на празниците.

Други, пак, се понудија да ѝ помогнат и да ги купат подароците што сака да им ги даде на децата.

Погледнете го видеото:

https://www.tiktok.com/@danielle_socials/video/7308697131768941857

Б. С. Б. | Црнобело