Листа на најбезбедните и најопасните држави во светот (Македонија е речиси на истата позиција како лани)

Детали

среда, 06 септември 2023

Исланд се смета за најбезбедна држава во светот, додека Македонија е на 38-мо место. Лани бевме на подобра позиција, односно на 37-мо место. Но, која е најопасната држава на светот?

Невладината организација Vision of Humanity и оваа година изработи извештај во кој ги рангираше државите според безбедноста.

Извештајот е познат како Global Peace Index, а за рангирањето на државите се земаат предвид фактори како убиства, насилство, тероризам, политичка нестабилност, насилни демонстрации, увоз на оружје и слично.

Државите се рангираат од најбезбедна до најопасна.

Во ланскиот извештај, Македонија најпрво се наоѓаше на 36-то место. Но, подоцна беа направени измени во извештајот, по што се најде на 37-мо место.

Годинава е една позиција подолу, односно на 38-мо место.

Од околните земји, побезбедна е само Бугарија (30-то место). Полошо рангирани се Албанија (40-то место), Грција (60-то место) и Србија (65-то место).

Како лани, и годинава Исланд е на врвот како најбезбедна држава за живеење.

И Авганистан си ја нема променето позицијата и важи за најопасна држава во светот.

Според извештајот, 84 држави забележале подобрување, но во дури 79 ситуацијата се влошила и сега се рангирани пониско.

Целиот извештај можете да го погледнете ТУКА.

10-те најбезбедни држави во светот, почнувајќи од најбезбедната:

• Исланд
• Данска
• Ирска
• Нов Зеланд
• Австрија
• Сингапур
• Португалија
• Словенија
• Јапонија
• Швајцарија

10-те најопасни држави во светот, почнувајќи од најопасната:

• Авганистан
• Јемен
• Сирија
• Јужен Судан
• Демократска Република Конго
• Русија
• Украина
• Сомалија
• Судан
• Ирак

Спирова С. | Црнобело

фото: depositphotos.com; Vision of Humanity