Златни момци! Нашите кошаркари до 18 години се европски шампиони - 8 натпревари без пораз во Скопје
- Детали
- понеделник, 05 август 2024
Горди сме на нашите момци - кошаркарите до 18 години го освоија првото злато во историјата на македонската кошарка на европските натпреварувања.
Македонските кошаркари вчеравечер (04.08) ја освоија првата титула на Европско првенство и со тоа испишаа историја во домашната кошарка.
Кошаркарите до 18 години го освоија златото во Б-дивизија и тоа без пораз на 8 натпревари.
На шампионатот што се играше во Скопје изминатите неколку дена, тие доминираа на секој натпревар, а во финалето ја победија Австрија сo 98:88 и го завршија првенството без пораз.
Со оваа титула, тие се пласираа во А-дивизијата и обезбедија настап на следното Европско првенство, што ќе се игра во Србија.
Интересно е што ова е прво злато на некоја македонска репрезентација во натпреварувањата на ФИБА, без оглед дали се работи за А или Б дивизија.
Нашиот капитен Никола Јаничиќ, кој вчера постигна 30 коша, беше прогласен за најдобар играч на првенството, а оваа титула му ја доделија селекторите на сите 22 земји-учеснички на првенството.
Во својот скор тој впиша и 5 скока, 4 асистенции, 4 освоени и 3 загубени топки.
Освен Јаничиќ, во идеалните пет кошаркари на првенството се најде уште еден наш кошаркар, Марко Луканоски.
А. Ј. | Црнобело / фото: Инстаграм
Би можело да ве интересира:





