Објави видео со тело на маж кој се самоубил и уште 5 скандали на популарниот јутјубер Логан Пол

Детали

недела, 12 февруари 2023

Логан Пол беше еден од најплатените јутјубери во светот, а зад себе има и неколку големи скандали. Снимањето мртво тело во озлогласената „шума за самоубиства“ во Јапонија и вознемирувањето девојки на улица се само дел од нив.

Логан Пол е еден од најпопуларните, но и еден од поконтроверзните јутјубери.

27-годишниот Американец моментално, февруари 2023 година, има 23,6 милиони претплатници на неговиот Јутјуб канал, додека на Инстаграм го следат 24,8 милиони корисници.

 

Логан Пол се најде на листата на најплатени јутјубери на Forbes, и тоа трипати – во 2017, 2018 и 2021 година, а неговото богатство се проценува на 45 милиони долари.

Покрај успешната Јутјуб кариера, Логан Пол е и професионален кечер и боксер, а од 2022 година има потпишано договор со World Wrestling Entertainment (WWE) – една од најголемите компании за организирање борби со кечери.

Логан почна да се прославува во 2013 година преку социјалната мрежа Vine која денес не постои. Истата година го направи и својот прв Јутјуб канал каде што продолжи да објавува видеа по „згаснувањето“ на Vine.

Во 2015 година направи уште еден канал кој брзо се прослави и со кој стана еден од најплатените јутјубери во светот.

На каналот, Логан објавува видеа со забавна содржина, како и видеа од неговите натпревари.

Тој има гостувано и во неколку филмови и серии, како Law & Order: Special Victims Unit и The Thinning: New World Order.

Логан заплива и во музичките води и издаде неколку песни, но крена раце од кариерата бидејќи сфатил дека го нема потребниот талент.

„Навистина се трудев, го дадов најдоброто од себе како вообичаено. Работев напорно и пробав да направам добра музика… Но, ова не функционираше. Го немав она што е потребно. И, сфатив уште едно нешто…

Јас повеќе сакам да работам на терен. Сакам да патувам. Сакам да си ги извалкам рацете и седењето во музичко студио по цел ден ми беше досадно“, изјави јутјуберот за неуспешната музичка кариера.

И покрај огромниот успех во неколку области и милионите фанови, Логан Пол честопати е осудуван поради своето однесување и неколку контроверзни видеа.

Дел од најпознатите контроверзии поврзани со јутјуберот во продолжение:

Расистички објави на Твитер

Во 2017 година, почнаа да се споделуваат твитови што јутјуберот ги објавил пред да стане познат, односно од периодот 2012-2014 година.

Повеќето од твитовите се со расистичка содржина, како:

„Сојата го зголемува естрогенот во телото, намалувајќи ја големината на пенисот – Азијати“.

Во поново време, Логан нема споделено ништо слично, па многумина сметаат дека може да му биде простено, особено кога ќе се земе предвид дека во периодот кога ги објавувал расистичките твитови сепак бил многу мал.

Продолжува на следната страница...