Загрижената Бритни Спирс оди на суд, првпат ќе сведочи против татко ѝ - ѝ диктирал како да ја офарба кујната, со кого да се дружи
- Детали
- среда, 23 јуни 2021
Денес (23.06) Бритни Спирс првпат ќе се обрати на суд во врска со легалното старателство на татко ѝ, кој не ѝ дозволувал да троши повеќе од 2.000 долари неделно, контролирал со кого ќе се дружи, па дури и каква боја ќе биде нејзината кујна.
Бритни Спирс ја продолжува битката со нејзиниот татко, а денес, 23-ти јуни, има сослушување во судот во Лос Анџелес. Претходно, пејачката беше забележана како излегува од шерифскиот оддел во округ во Калифорнија, по консултација за нејзиниот случај.
Пејачката беше во друштво на телохранител и носеше лежерна облека – кратки панталони, широка бела кошула, сив кардиган и сандали. На фотките Бритни изгледа доста загрижено.
Иако нејзиното момче Сем Ашгари отворено ја поддржува во битката против татко ѝ, овојпат не беше со неа.
Денешното сослушување на пејачката е всушност нејзиното прво обраќање до судот од почетокот на битката со татко ѝ. Неодамна, познатиот весник The Times објави извештај напишан од судски истражувач уште во 2016 година, според кој Бритни се пожалила дека татко ѝ, заедно со некој адвокат, ја контролирал до тој степен што ѝ кажувал со кого може да се гледа, па дури и како да си ја офарба кујната. Во истиот извештај пишува дека Бритни се пожалила и за алкохолизмот на татко ѝ.
„Таа смета дека легалното старателство сега е премногу угнетувачко и е алатка за нејзино контролирање. Повеќе не сака да биде искористувана и вели дека таа работи за нејзините пари, но ги трошат сите околу неа“, стои во извештајот.
Според објавата на The Times, татко ѝ бил опседнат со неа до тој степен, што контролирал со кого ќе се дружи, а според некои сведоци, неретко и ѝ се заканувал. Во извештајот е нагласено дека и покрај поплаките на Бритни, судот одлучил татко ѝ да го задржи старателството.
Татко ѝ, Џејми, има контрола над нејзините финансии од 2008-ма година, кога менталното здравје на Бритни се влоши. Пејачката првпат се обидела да се ослободи од старателството уште во 2014-та, во периодот кога почна со редовните настапи во Лас Вегас. И покрај тоа што пејачката заработуваше милиони од овие настапи, татко ѝ не дозволувал да троши повеќе од 2.000 долари неделно.
Лани, пак, Бритни изјави дека била присилена да настапува против нејзина волја, но и да престојува во ментална институција, наводно како казна бидејќи почнала да се буни за време на проба. Во 2019-та пејачката изјави дека нема да настапува сè додека не ја добие својата независност од татко ѝ.
На денешното сослушување, изворите велат дека пејачката нема да бара целосно отстранување на легалното старателство, туку ќе бара замена за татко ѝ. Односно, таа сака некој друг да биде нејзин легален старател.
Во јавноста, Бритни речиси и да нема прозборено ништо за овој случај. Единствено, таа се огласи за документарецот Framing Britney Spears, изјавувајќи дека плачела со недели откако го изгледала. Истовремено, таа ги праша сите зошто упорно се фокусираат на најлошиот период од нејзиниот живот.
Нејзиното момче, од друга страна, ја поддржува и јавно.
„Сем ѝ е огромна поддршка на Бритни. Ѝ помага да си ја врати самодовербата и ја убедува дека сè ќе биде во ред. Тој го следи движењето FreeBritney онлајн и постојано ѝ кажува колку нејзините фанови ја сакаат и поддржуваат“, вели извор за Page Six.
Пред неколку месеци, Сем и јавно прозборе за ситуацијата со татко на Бритни:
„Важно е луѓето да разберат дека немам воопшто почит за некој кој се обидува да ја контролира нашата врска и постојано ни поставува пречки. Според мене, Џејми Спирс е кретен“, напиша 27-годишниот Сем на Инстаграм Стори.
Младиот актер додаде и дека иако е личност која ја цени својата приватност, сметал дека мора да го искаже свoето мислење.
Неодамна, пак, за TMZ, Сем изјави дека се надева дека ќе може да биде во добар однос со татко на Бритни, но „само кога ќе почне да се однесува добро кон ќерка му“.
Спирова С. | Црнобело
Би можело да ве интересира:
Препорачуваме
Најчитани неделава
