„Не беше зрел за да има дете“ – Зошто никогаш не слушаме за таткото на Џастин Бибер?

Детали

среда, 02 јуни 2021

Кога се родил Џастин, татко му имал едвај 18 години, па плашејќи се од одговорноста што доаѓа со родителството, бил речиси постојано отсутен од животот на син му во првите години од неговиот живот. Иако денес Џастин и татко му се во добри односи, пејачот вели дека поставил „здрава граница“ во нивниот однос, па речиси воопшто не ги гледаме заедно во јавност.

Денес Џастин Бибер е една од најголемите ѕвезди на музичката сцена, но сте забележале ли дека не знаеме скоро ништо за неговото семејство, особено неговиот татко?

Фановите на пејачот знаат дека тој пораснал во Канада, со неговата мајка Пети која била во тинејџерските години кога го родила. Но, се чини дека никој не знае ништо за неговиот татко Џереми, без разлика што тој е уште жив.

Па, што точно се случило помеѓу родителите на Џастин и каков е неговиот однос со татко му?

Џереми не бил доволно зрел да се грижи за дете

Како што напоменавме, мајката на Џастин билa тинејџерка кога останала бремена. Односно, и таа и татко му Џереми имале едвај 18 години. Џереми и Пети биле во врска во периодот 1991-1994, но никогаш не стапиле во брак.

Кога откриле дека Пети е бремена, двајцата самo што завршиле средно и, нормално, не билe подготвени за дете – ни психички, ни финансиски.

Веројатно Џереми се исплашил од целата ситуација, па Пети останала сама со нивното дете во првите години од неговиот живот. Некогаш добивала помош од нејзината мајка, но генерално морала сама да се грижи за Џастин со минимална плата.

Џастин има прозборено на оваа тема, откривајќи дека неретко татко му ги напуштал и не се враќал со години.

„Беше незрел за дете. Кога имав четири години, замина за Британска Колумбија и се врати дури една година подоцна“, изјави пејачот во интервју за Billboard.

Џастин вели дека кога Џереми се вратил од Британска Колумбија, мајка му го замолила посериозно да ја сфати улогата на татко.

„Се сеќавам дека мама му рече: ’Ако сакаш да бидеш овде, мораш да бидеш овде‘“.

Зборовите на Пети го натерале Џереми да се промени, па тој конечно се фокусирал на неговиот син.

Сепак, Џастин има само добри зборови за својот татко

Младиот пејач има изјавено дека иако неговите родители ја немале најздравата врска, по прекорот на Пети, Џереми бил поприсутен во животот на Џастин. Всушност, токму тој го натерал пејачот да ја засака музиката, го научил да свири гитара и го охрабрувал да пее.

„Тој сепак беше присутен во мојот живот. Се гледавме скоро секој викенд“, открива Џастин.

И Пети и Џереми го поттикнувале Џастин да се пријавува во шоуа за таленти и да снима кавери за YouTube, а токму ова му помогна да се прослави.

Покрај Џастин, Џереми има и други деца

Како што напоменавме, родителите на Џастин никогаш не биле во брак, но Џереми двапати го кажал судбоносното „Да“. Првпат се венчал во 2007-ма, а од тој брак има две деца. Во 2014-та се развел од првата сопруга и во 2018-та се венчал со втората. Од вториот брак, Џереми има уште едно дете.

Бројни сличности

Џастин е добро познат по недоличното однесување, а изгледа го наследил ова од татко му.

Во 1997 година Џереми бил уапсен за напад и добил казна затвор од 90 денови. Еднаш, пак, кога добил условна казна, ја прекршил, па поради ова поминал три недели зад решетки.

Во 2002 година Џереми бил уапсен уште еднаш, повторно за физички напад, но две години подоцна обвиненијата биле отфрлени.

Денес Џастин има поставено граница во односот со татко му

Целото негативно искуство со татко му го натерало Џастин да сфати дека потребно е време да се изгради здрава и стабилна врска со родителите.

„Сакам кога работиме на проблемите за да стигнеме до убавите моменти“, има изјавено пејачот, нагласувајќи дека вреди да се бори за добриот однос со неговиот татко.

Со текот на времето, пејачот се оддалечил од татко си, сметајќи дека некогаш треба да се постават здрави граници помеѓу нив.

„Не ви требаат родителите толку многу. За нив, вие сте биле сè што имале. Тие инвестирале во вас. Но еден ден, едноставно, ќе си заминете, ќе почнете со својот живот и тогаш нема да ви требаат. И, нема да го цените нивното мислење толку многу“, изјави тој.

Спирова С. | Црнобело