„Џек требаше да се роди деновиве, веќе требаше да го држам во раце“ – Криси Тајген со емотивна објава за спонтаниот абортус

Детали

петок, 05 февруари 2021

Во спотот на Wild, песната на Џон Леџенд, Криси Тајген откри дека е бремена со синот Џек, а сега, во периодот кога тој ќе требаше да се роди, таа сподели фотки од снимањето со емотивен опис за спонтаниот абортус и изгубениот син, откривајќи дека не може да го гледа спотот без да се расплаче.

Криси Тајген објави неколку фотки на Инстаграм од снимањето на спотот за Wild, песната на нејзиниот сопруг Џон Леџенд. Во описот 35-годишниот модел открива дека тој период била бремена со синот Џек. Истовремено, таа и Џон сакале да ги споделат новостите за бременоста преку видеото.

За жал, неколку месеци после снимањето, Криси доживеа спонтан абортус и го изгуби детето.

Сега, моделот уште еднаш се отвори во врска со целата ситуација, изјавувајќи дека никогаш нема да го гледа спотот без да плаче:

„Овие фотографии се од снимањето на спотот за Wild во Мексико. Бев во 10-та недела од бременоста и премногу среќна. Знаев дека ќе треба време за да се склопи видеото, па мислевме дека ќе беше слатко да ги споделиме новостите за бременоста преку него. Не можев ни да замислам што ќе се случи следните 10 недели…

Мислам дека нема да можам да го изгледам тоа видео уште еднаш без да се расплачам, но се надевам дека Џек ги чувствува моите солзи и знае дека премногу ни недостасува. Требаше да се роди деновиве – ако беше како Луна или Мајлс, веројатно веќе ќе го држев во рака додека го пишував ова“.

View this post on Instagram

A post shared by chrissy teigen (@chrissyteigen)

„Многу жалам што не му го видов лицето кога се роди. Бев толку исплашена дека ќе го гледам во кошмарите, што заборавив да го гледам во соништата. Секој ден страдам од тоа. Овој месец е суров потсетник и, искрено, мислев дека најлошо помина, но изгледа животот и емоциите не следат никаков распоред.

Ве сакам сите и благодарна сум за вашите поддршка и љубов. Цврсто верувам дека енергијата и љубовта патуваат низ ноќното небо и јас ги чувствувам. Ви ветувам дека ги чувствувам. И, те сакам Џек. Премногу ми недостасуваш“, пишува во описот на објавата.

Криси и Џон се во брак од 2013-та година, а заедно имаат две деца - ќерката Луна и синот Мајлс.

Спирова С. | Црнобело