Се заканувал дека ќе ја убие – Сопругот на Кристина Ричи доби забрана за приближување, откако го обвини за семејно насилство

Детали

петок, 22 јануари 2021

Актерката Кристина Ричи побара забрана за приближување на нејзиниот сопруг, откако го пријави за семејно насилство, тепање и малтретирање, а изјавила и дека ѝ се заканувал со убиство и киднапирање на детето.

Кристина Ричи го обвини нејзиниот сопруг, Џејмс Хирдеген, за семејно насилство, изјавувајќи дека тој ја тепал и малтретирал, пред таа да поднесе барање за развод во јуни минатата година.

40-годишната актерка вели дека еднаш морала да крие ножеви низ куќата, бидејќи Џејмс ѝ се заканувал дека ќе ја убие, притоа велејќи ѝ дека ќе му биде жал само ако била „исечена на мали парчиња“.

Потресната приказна на актерката брзо стигна до светските медиуми и наводно, во документите што ги доставила до судот имало и фотографии на кои се гледаат модринки по нејзиното тело. Кристина побарала од судот да му даде забрана за приближување на Џејмс, а судиите ѝ го исполниле барањето оваа недела.

Наводно, сега Џејмс не смее да ѝ се приближи на Кристина повеќе од 90 метри, не смее да му се приближи на нивното синче, ниту, пак, на нивното куче.

Според адвокатот на Џејмс, сопругот на актерката тврди дека е невин, па дури и дека тој самиот ќе побара забрана за доближување за Кристина и наводно ќе открие докази за нејзиното „насилничко однесување под дејство на алкохол и други супстанци“.

Според светските медиуми, актерката тврди дека проблемите со насилство почнале кон крајот на 2019-та година. Џејмс ја нападнал, ја удирал и ја понижувал, а таа тогаш одлучила дека мора да поднесе барање за развод, после осум години брак.

Таа му кажала на Џејмс, но поради пандемијата и карантинот не можела да направи ништо, па останала заробена со него, а дури ѝ било страв да спие. Во тужбата, актерката навела два инциденти во јуни – еднаш Џејмс не ѝ дозволувал да се јави во полиција и повторно ја нападнал, а вториот пат ја нападнал пред нивниот син. Истиот месец, актерката поднела барање за развод.

Кристина нагласила дека најмногу се плаши за нивното дете, бидејќи Џејмс неколкупати се заканувал дека ќе го киднапира. Истовремено, ги замолила судиите да го спречат Џејмс во намерата да ја понижи и посрамоти со слики и видеа што ги направил додека биле заедно.

Кристина и Џејмс се запознаа на сетот на Pan Am, беа во врска две години, а се венчаа во 2013-та. Во 2020-та Кристина поднела барање за развод, наведувајќи ги разликите помеѓу нив како причина.

Сега актерката ја откри вистинската причина за оваа одлука, а бара и целосно старателство за нивниот син.

Спирова С. | Црнобело