Поради љубоморните сопруги: Ѕвезди кои не смеат да работат заедно

Детали

недела, 08 април 2018

Кој се плаши од фаталната Анџелина Џоли? Зошто на Нина Добрев и Ијан Сомерхолдер им е забрането повторно да застанат пред камера?

Познато е дека мноштво романси, но и прељубнички афери, родени се при снимањето на холивудските филмови и серии. Хемијата помеѓу ликовите, глумците неретко ја пренесуваат и во вистинскиот живот. Но, кога страста ќе се разгори, многумина не размислуваат за последиците.

Неодамна пишувавме за актерот Јуан Мекгрегор, кој ги напушти жената и децата за љубовницата, па таа го откачи бидејќи ѝ штети на угледот. Романсата помеѓу глумецот и колешката Мери Елизабет започна за време на снимањето на серијата „Fargo“. А, стави точка на неговиот дведецениски брак. 

Свежи ни се и сеќавањата и за љубовниот триаголник што ја разбранува јавноста. Бред Пит и Џенифер Анистон беа пет години во брак, кога актерот започна со снимање на филмот „Mr. & Mrs. Smith“, каде главната женска улога ја имаше занесната Анџелина Џоли. Навидум складниот брачен пар се разведе, а причината беше преубавата глумица. По сопствено признание, Бред и Анџелина се вљубиле на филмскиот сет.

За да избегнат слично сценарио во сопствениот брак, дел од понежните половини им забранија на своите сакани мажи да снимаат со одредени глумици.

Па, поради љубоморните сопруги, ова се ѕвездите кои не смеaт да работат заедно:

Ијан Сомерхолдер и Нина Добрев

Љубовта помеѓу актерите Ијан Сомерхолдер и Нина Добрев се роди за време на прикажувањето на хит серијата „The Vampire Diaries“. Парот беше во врска од 2010 до 2013 година.

Во 2014 година, пак, глумецот почна да се забавува со колешката Ники Рид. Се венчаа една година подоцна, а лани го добија и првото дете.

Фановите кои се надеваат на нов проект со Сомерхолдер и Добрев во главните улоги, веројатно ќе останат разочарани. Ијан веќе не смее да застане пред камера со бившата, бидејќи неговата сегашна жена нема да биде среќна поради тоа.

Џенифер Гарнер и Скот Фоули  

Џенифер Гарнер и Скот Фоули се запознале при снимањето на серијата „Felicity“ во 1998 година. Aктерската двојка беше во брак од 2000 до 2004 година.

После разводот, американскиот глумец се прежени за колешката Марика Доминчик. Гарнер, пак, се омажи, а подоцна и се разведе од Бен Афлек.

Сегашната жена на Скот Фоули не сака да ги гледа некогашните сопружници заедно - дури ни на филмското платно.

Хју Џекмен и Анџелина Џоли

Хју Џекмен ја обожава својата 13 години постара сопруга. Заедно се повеќе од две децении во брак.

Сепак, 62-годишната Дебора-Ли Фурнес се плаши дека една жена може да ѝ ги замрси конците. Станува збор за фаталната Анџелина Џоли.

Таа дури и јавно призна дека не му дозволува на актерот да глуми заедно со холивудската убавица. 

Кристен Стјуарт и Руперт Сандерс

19-години постариот режисер и актерката имаа тајна афера, дури тој беше во брак со Либерти Рос. Откако беа фотографирани како разменуваат нежности во 2012 година, обајцата се огласија со јавно извинување.

Сопругата му забрани на Руперт Сандерс веќе некогаш да снима филм со љубовницата. Меѓутоа, бракот им се распадна две години подоцна.

А, не опстана ниту врската помеѓу Кристен Стјуарт и нејзиниот колега Роберт Патинсон – исто така поради неверството.

М. А. | Црнобело