Во сенка на сопругата: Зошто Канје се крие позади Ким?

Детали

петок, 06 април 2018

Позата открива многу за карактерите, но и односот на светски популарната двојка Кардашијан-Вест. 

Тие се брачен пар што буквално живее пред камерите. Снимаат реално шоу и везден се сликаат за социјалните мрежи.

Навикнати се и на блицот од фоторепортерите, кога и да стапнат на црвениот тепих. А, како ова да не е доволно, папараците ги демнат каде и да се појават. 

Сепак, се чини дека ни после толку години, Ким Кардашијан и Канје Вест не се подеднакво опуштени, барем кога се работи за заедничкото позирање.

Веројатно сте забележале дека наместо да стои покрај сопругата, раперот редовно е во нејзина сенка, односно се крие позади старлетата. Што е причината?

Одговорот го дадоа двајца професионалци за говор на телото и детектирање лаги, правејќи анализа на динамиката во нивната врска.

Според експертите, позата при фотографирање не открива само како сопружниците се поврзани еден со друг, туку многу говори и за индивидуалниот карактер. 

„Станува збор за славна двојка со огромна моќ, па многумина би помислиле дека обајцата ќе сакаат да го споделат вниманието. Ова мошне често го прават другите холивудски ѕвезди, така што застануваат рамо до рамо со партнерите. Но, кога се тие во прашање, не е така.

Канје свесно одбира да го сокрие своето тело позади фигурата на Ким. Прави да изгледа помало и во подредена положба, внимавајќи да не ги украде погледите. Раперот ја користи сопругата како проактивна бариера, која му овозможува да се вклопи во околината, без сите очи да бидат вперени кон него.“

По мислење на Дарен Стентон, говорот на тело одава впечаток дека Канје Вест е срамежлив по природа, а Ким Кардашијан е полна со самодоверба, па не се плаши да биде во фокусот.

Можно е мажот и несвесно да се постави позади партнерката - како знак на заштита.

Меѓутоа, експертката Пати Вуд тврди дека овој начин на позирање е масло на старлетата. Убавицата сама се става во преден план. 

„Ако дамата го истакнува целото тело и гледа директно кон камерата, таа покажува желба да биде број 1. Ким е главна на фотографиите. Очигледно е дека се чувствува добро во своја кожа, како и она што го носи на себе.

Истовремено, се забележуваат и знаци на алфа жена, како што се нагласениот колк, рацете на колковите и придвижување на едно од стапалата кон надвор. Ги користи да ја покаже нејзината супериорна моќ.“ 

На крајот, професионалците се децидни дека тие како карактери не си противречат, туку се врамнотежуваат во врската.  

„Од фотографиите може да се заклучи дека егото на Канје е потполно притаено во односот кон Ким. Не му пречи што таа доминира. Напротив. Среќен е што сопругата е во центарот на вниманието.“

M. A. | Црнобело