По борбата со ракот, емотивна средба на Шенон Доерти со ѕвездите од „Беверли Хилс“ (фото)

Детали

среда, 22 март 2023

Актерката Шенон Доерти викендов имаше емотивна средба со Тори Спелинг, Џени Гарт, Џејсон Пристли и Иан Зиринг, ѕвездите на хит-серијата „Beverly Hills 90210“. Ова беше едно од првите излегувања на Шенон во јавноста, откако неодамна откри дека повторно го победила ракот. На средбата единствено недостасуваше Лук Пери, кој ненадејно почина во 2019 година, за екипата да биде цела.

Шенон Доерти и останатите актери од серијата се сретнаа првпат по скоро три години, а 23 години откако заврши снимањето на оригиналната серија.

Тие беа дел од „90s Con“, настан посветен на најпопуларните и најгледани серии во 1990-тите години.

Дружењето на актерите го одбележаа многу смеа, анегдоти од минатото, заеднички фотографии, но и фотки со фановите, кои и по триесет години уште ја сакаат серијата за близнаците Бренда и Брендон кои од мал град се селат со родителите во Beverly Hills 90210, една од најелитните населби во Лос Анџелес, па почнуваат нов живот.

Тинејџерската серија беше меѓу најгледаните од 1990-та до 2000-та година. Непознатите млади актери преку ноќ станаа светски ѕвезди.

И иако по крајот на серијата никој од нив не направи голема кариера, тие и понатаму останаа популарни.

Најмногу фотографии на социјалните мрежи објави Џени Гарт (Кели).

„Повеќе беше како Friends Con Loved, да се видат некои познати и пријателски лица“, напиша таа, но доби негативни коментари зошто на ниедна од нејзините слики ја нема Шенон.

Во текот на конвенцијата Џени и Иан покажаа и дека добиле кукли со своите ликови.

По ова Гарт на критичарите им одговори на фановите дека немале ист распоред, бидејќи Шенон беше дел и од панелот на серијата „Charmed“ (Волшебнички).

Доерти освен што се дружеше со ѕвездите и фановите на „Beverly Hills 90210“, помина време и со обожавателите на „Волшебнички“, но и со актерките со кои глумеше таму, Роуз Мекгован и Холи Мари Комбс.

На дружбата со нив не беше единствено Алиша Милано, која глумеше во оригиналната постава на серијата.

А. Ј. | Црнобело