Норвежаните го кријат идентитетот, Летонците имаат вулгарна песна - Најнеобичните претставници на Евровизија 2022

Летонската песна е за „зелениот начин на живеење“, а уште во првиот стих има вулгарности што се цензурирани. Норвежаните пак не го знаат идентитетот на нивните претставници бидејќи си го кријат ликот - несекојдневни претставници на Евровизија 2022. 

Минатата недела Србија ја избра Ана Ѓуриќ - Констракта за претставник на Евровизија 2022, но сигурно тоа нема да е најчудниот настап на земјите годинава, иако предизвика бура реакции. 

Според многумина песната на Констракта е нешто сосема ново и несекојдневно, а мислењата се поделени: едни ја обожаваат, а други сметаат дека Србија можеше да избере и подобар претставник.

Многумина коментираа за изборот на песната во Србија, со која Констракта сака да ја поткрене свеста за здравственото осигурување на уметниците, а од нејзината победа беше изненадена и самата таа.

Сепак, ако се погледне меѓу другите земји што веќе ги избраа своите претставници може да се забележат и понесекојдневни претставници и песни.

Така, Летонците годинава на Евровизија 2022 ќе се појават со песна со која сакаат да укажат за тоа колку е важно да се зачува животната средина.

Летонската група Citi Zēni ќе настапи со песната Eat your Salad (Изеди ја салатата).

Нивната песна го слави вегетеријанскиот начин на исхрана и еколошкиот начин на живот, а уште во првиот стих песната започнува со вулгарности, што секако беа цензурирани за време на нивниот настап во Летонија.

Норвежаните пак, се впечатливи по стајлингот со жолтите маски. Норвешкото поп-дуо Subwoolfer почнало да креира музика минатата година, а публиката за првпат имала можност да ги запознае преку изборот за песна на Евровизија, Melodi Grand Prix 2022.

Засега нивниот идентитет во целост е непознат, а самите себеси се нарекуваат Кит и Џим.

Тие годинава ќе настапат со песната Give that Wolf a Banana, а не сакаат да одговараат на прашањата поврзани со нивниот идентитет.

Велат дека дуото Subwoolfer е старо 4,5 милијарди години и дека живеат на Месечината.

Б. С. Б. | Црнобело