„Неговиот длабок глас предизвикува морници“ – Кој е Јон Ајди, еден од кандидатите за македонски претставник на Евровизија 2022?

„Неговиот длабок глас предизвикува морници“ - ова го пишуваат светските портали за музиката на нашиот кантавтор Јон Ајдини. Што знаеме за момчето што гради светска кариера, а е еден од кандидатите за македонски претставник на „Евровизија 2022“?

Јон Ајди е уметничкото име на Јон Ајдини, момчето што со неговата песна Dreams влезе во Националниот избор за песна и претставник што ќе ја претставуваат Македонија на „Евровизија 2022“.

Зад музиката и текстот на Dreams се потпишува Јон Ајди, а аранжманот е на Ангел Ќосев. Јон е момче од Скопје, кој е роден во 1995-тата година, а неговите песни во инди рок стил, полека но сигурно ја освојуваат светската публика.

Тој досега има издадено осум песни, кои се емитуваат на голем број радио станици низ светот: САД, Велика Британија, Германија, Швајцарија, Грција, Хрватска, Албанија, Косово итн.

На видеата од неговите спотови забележителни се голем број коментари од луѓето во регионот што веќе ја слушнале неговата музика и не можат да поверуваат дека станува збор за музичар од Македонија.

„Како од Скопје?!“, „Па, ова звучи светски!“, „Мислев дека е некој странец“, „Со денови се обидував да најдам кој ја пее песнава, за на крај да излезе дека е наш пејач?“, „Светско, а наше“ – стои во некои од коментарите под видеата и на социјалните мрежи.

Јон веќе го привлече вниманието во светските музички порати и блогови, па така за неговата песна Back Around музичкиот портал Sounds European напиша:

„Yon Idy е македонски пејач од Скопје. Само што го објави новиот сингл Back around и песната е извонредна. Има неверојатна мелодија и незаборавна вокална изведба.

Тоа е дефинитивно најдобрата песна што ни доаѓа од Северна Македонија. Целосно сме зависини од неа: тоа е нашата песна на неделата“.

Британскиот музички блог Indie Dock Music Blog објави своја рецензија за песната My Fire за која меѓу другото напиша:

„Yon Idy креирал песна од која се чувствува моќта на страста. Неговиот стил фасцинира со автентичноста и елеганцијата“.

„Неговиот длабок глас предизвикува морници низ вашето тело“ - се вели во рецензијата објавена на порталот Sinusioidal.

Слушнете ја песната Dreams која е еден од кандидатите за македонски претставник на „Евровизија 2022“.

https://www.instagram.com/tv/CZSp6fRAq-g/?utm_source=ig_web_copy_link

Б. С. Б. | Црнобело