Средношколци од Македонија освоија престижна награда со нивниот изум - 3Д печатена бионичка рака

Детали

петок, 05 февруари 2021

Во Македонија се кријат многу надежни иноватори, а тоа го докажува и тимот средношколци, кои направија 3Д печатена бионичка рака која е дури 50 пати поевтина од постоечките протези.

Бионичката рака, изум на Орхан Багашов, Тео Китановски, Борис Ночески и Анамариа Илиева, е глобален победник на натпреварот Generation Unlimited – Youth Challenge, во кој учествуваа 180 тимови од 36 држави ширум светот.

Орхан Багашов е задолжен за дизајнот и електрониката, Тео Китановски за програмирањето, Борис Ночески за социјалните мрежи, Анамариа Илиева за изработката на веб-сајтот, a нивниот тим е наречен eBionics.

https://www.instagram.com/p/CFJ_LH0JdAl/

Орхан најпрво планирал да направи роботска рака, но додека истражувал за својот проект, сфатил дека цената на бионичките раце е огромна. Тогаш, тој и тројцата средношколци од тимот почнале да истражуваат за да откријат што им е најпотребно на луѓето без горен екстремитет и си дале за цел да го решат овој проблем.

За да го направат прототипот на раката за потребите на натпреварот, тимот имал рок од само три дена. И, дефинитивно одлично си ја завршиле работата - ги поминаа првите два круга, а во декември 2020-та, ја освоија и главната награда на натпреварот.

Бионичката рака, наречена Venus Arm, е направена со 3Д печатач и претставува електронска протеза која ги детектира мускулните импулси од подлактницата со помош на сензори.

https://www.instagram.com/p/CAIi-OrAQnq/

„Нашиот модел подразбира дека секој кој има потреба од бионичка рака ќе може да избере своја големина, да ги симне бесплатните модели за 3Д печатење преку интернет, да ја испечати конструкцијата со 3Д печатач, да ги нарача останатите делови од интернет и да ја состави сам, без никакво претходно искуство, во период од 6-7 часа“, велат од тимот.

https://www.instagram.com/p/CFJ_e0bJ1br/

Младите иноватори сметаат дека ова е одлично решение за луѓето без горен екстремитет, бидејќи материјалите за изработка се многу поевтини, а не се плаќа за транспорт, работна рака и профит за производител и добавувач.

„Претпоставената цена за изработка е од 150 до 200 евра, што е околу 50 пати поевтино од наједноставните бионички раце на пазарот“.

https://www.instagram.com/p/CEHgCw2pIN0/

Од тимот велат дека нивната целна група се луѓе кои немаат горен екстремитет и секојдневно се соочуваат со разни проблеми поради ова, како пишување, користење компјутер, интеракција со какви било предмети...

Веќе постојат бионички раце за оваа намена, но најголемиот проблем е што тие чинат 10.000 долари, па и повеќе. Истовремено, најчесто децата се изосавени кога станува збор за бионичките протези, бидејќи постојано растат, па ќе треба да променат неколку протези. Ова значи дека за нив, протезата чини многу повеќе од 10.000 долари. Но, изуот на eBionics ветува дека ќе го промени тоа.

https://www.instagram.com/p/CI3AEaGHMT_/

Спирова С. | Црнобело