Скопјанецот Игор ја запроси саканата Симона во Лисабон: „Ме изненади, па прво кажав: 'Нема шанса'“

Детали

петок, 11 октомври 2024

„Многу блиски ми кажаа 'знаев', откако објавивме фотографии со прстенот, но јас не очекував, баш 0% - оттаму и мојата реакција“, вели водителката Симона Илиеска за запросувањето во Португалија.

Скопјанецот Игор Бачваровски ја запроси саканата Симона Илиеска од Прилеп на нивното 10-дневно патување во Португалија.

Игор, кој е сопственик на туристичка агенција, го испланирал запросувањето, а Симона (репортер/водител во утринската програма на МТВ, „Македонија наутро“) била толку изненадена, што кога ја побарал за сопруга, наместо „да“ му кажала „нема шанса“.

За нивната љубовна приказна и неочекуваното запросување во Лисабон, таа раскажа за CRNOBELO.com:

„Заедно сме три години, се запознавме преку туристичката агенција на Игор, кога јас сакав да резервирам одмор за мене и мојата најдобра другарка.

Запознавањето беше многу спонтано и апсолутно непланирано, а таков беше и почетокот на врската.

Со Игор често сме разговарале за бракот и за тоа дека би сакале да имаме свое семејство, но тој, (веројатно плански), секогаш завршувал со „Млад сум, рано ни е“, а има 30 години, ха, ха.

Ме запроси на нашето патување во Португалија, и ако сум најискрена, не очекував дека сега ќе ме побара за сопруга.

Многумина блиски ми кажаа „знаев“, откако официјално објавивме фотографии со прстенот, но јас не очекував, баш имав 0% очекување.

Инаку, запросувањето се случи на последниот ден на нашиот одмор во Португалија, на сосема „рандом“ локација, односно дел од Лисабон кој го оставивме за „ако стигнеме“.

Тоа е место од каде што се простира одличен поглед на цел Лисабон, пред огромна статуа на Исус Христос.

Игор потоа ми кажа дека планирал запросувањето да биде на крстарење низ Лисабон, но времето не нè послужи.

На крај, запросувањето беше многу спонтано, без посебен говор, со единствено прашање „Дали ќе се омажиш за мене?“

А мојот прв одговор беше: „Нема шанси!“

Тоа ми беше првата реакција затоа што бев преизненадена и воопшто не очекував вакво нешто, барем не сега.

Прстенот ми е точен, за големо чудо.

Во целиот процес на бирање прстен и на негово „прикривање“ во текот на целото патување во Португалија, заслужен е Далибор Шијаковски кој е заедно со нас и со неговата девојка.

Игор имал малку трема пред да ме запроси и тоа во моментот кога одел да го земе прстенот од автомобилот.

Инаку, за запросувањето јас сакав прво да дознае мојата сестра, но прв одговори нејзиниот сопруг и му беше навистина многу драго.

Секако дека најмногу се израдуваа најблиските, односно родителите на Игор и моите родители, како и најблиските пријтели.

Планови за свадба немаме, но веќе со возбуда ја планираме заедничката иднина.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело