Браво! 13-годишни деца од Радовиш собраа пари за да му помогнат на соученик со проблеми со говорот

Детали

среда, 03 април 2024

Пет деца од Радовиш напорно работеа за да соберат средства и да му обезбедат логопедски третман на 10-годишен соученик кој има проблеми со говорот. Преку собирање донации и дружба со него, овие деца покажуваат дека хуманоста може да се научи од најмали нозе.

Убаво е да слушнете дека децата од најмала возраст се учат на хуманост и на тоа да им помагаат на своите другарчиња и врсници на кои им е потребна помош и поддршка.

Таква е и приказната за 13-годишните деца волонтери од Радовиш и радовишко, кои се вклучени и работат во рамки на националната алатка на Црвениот крст на Република Северна Македонија, Црвен крст во акција – промоција на хумани вредности (ЦКА – ПХВ).

Децата учествуваа на различни настани и успеаја да соберат доволно средства за да му помогнат на 10-годишниот Давид од селото Калуѓерица, кој има потреба од логопедски третман, а неговите родители не се во можност да му го обезбедат.

За овој проект поразговаравме повеќе со Герасим Димитров – ПХВ Дисеминатор за 2024 година од Општинскиот црвен крст во Радовиш.

Тој за CRNOBELO.com појасни како биле собирани средствата и како изгледал проектот на младите волонтери:

„’Детски глас‘ е еден од шесте ПХВ-проекти на Општинската организација на Црвен крст од Радовиш.

Пет младинци од Радовиш му помагаат на малиот Давид да добие говор.

Како прво, собираат средства преку хуманитарни настани, за Давид да добие логопедски третман.

Беа организирани два хуманитарни настани: еден во ООУ Орце Николов од с. Ињево, каде што учат некои од младинците и еден во подрачното училиште во с. Калуѓерица, каде што учи Давид.

Исто така по повод 1-ви април, имаа активности на терен: „Под маски за детски глас“.

За симболична донација, посетителите на паркот во Радовиш можеа да го фотографираат своето дете со маска или да му подарат на своето дете маска“.

Благодарение на овие хуманитарни настани, младите волонтери успеале да соберат пари за Давид да започне со логопедски третмани во Радовиш, а Герасим потенцира дека, освен што помагаат со собирање донации, младинците се тука за да се дружат со соученикот и да му помогнат преку дружба во формирањето на говорот.

„Поминатото време со Давид исто така влијае на развојот на неговиот говор. Така, овие волонтери го прославија роденденот на Давид, и поминуваат време со него.

Да му се „даде глас“ на едно дете е многу важна работа. Тоа значително ќе му го подобри квалитетот на животот.

Мотото на проектите оваа година, како и минатата година гласи: „Мали сме, но доволно големи за големи нешта“.

Под тоа мото овие мали волонтери прават огромни нешта“ – раскажува Герасим.

Освен во овој, младите волонтери при Црвениот крст во Радовиш се вклучени и во повеќе други проекти.

Поттикнати од пораката на новата иницијатива на Македонски Телеком „Да направиме место за вистински да се поврземе“, којашто поттикнува отвореност и меѓусебно разбирање, за што говореше и Горан Стефановски, редакцијата на CRNOBELO.com ќе направи повеќе место за добри вести и приказни кои инспирираат.

©CRNOBELO.com Забрането преземање и копирање. Крадењето на авторски текстови е казниво со закон.

Б. С. Б. | Црнобело