Барбара Поповиќ со емотивна изведба на „Зајди, зајди“ го расплака Дарко Димитров: „Ти си гордост на Македонија“

Детали

вторник, 28 ноември 2023

„Еднаш кажав дека си гордост на Македонија, но денес јас сум горд што сум Македонец. Оваа песна е македонска химна и мене и на сите Македонци ни е една од најубавите. Ова е песна на Александар Сариевски и мислам дека и тој ќе биде горд што Барбара вака ја претставува Македонија“, кажа Дарко Димитров.

Македонската пејачка Барбара Поповиќ, која се натпреварува во регионалното музичко шоу „IDJ Show“, маестрално ја испеа „Зајди зајди“ и ги расплака Дарко Димитров и Наташа Беквалац, кои се членови на жирито.

Ни таа не можеше да ги задржи солзите по нивните коментари, кои почнаа уште од самиот водител на шоуто кој ѝ рече дека емоција како што покажа таа додека пееше, не може да се одглуми.

„Беше сензационална вечерва, звучеше спектакуларно. Со оваа песна го покажа целиот свој талент“, ѝ кажа Наташа Беквалац со насолзени очи.

„Моја среќа што не плачам на оваа песна, инаку ќе заплачев и јас“, рече Реља кој е исто така член на жирито, а кој претходно се расплака додека еден од кандидатите ја пееше „Не куни ме, не ружи ме мајко“ од Луис.

Последен својот коментар го даде композиторот и продуцент Дарко Димитров. Тој не штедеше пофалби за пеењето на Барбара, а не криеше ни колку го допрела нејзината емотивна изведба.

„Еднаш кажав дека си гордост на Македонија, но денес јас сум горд што сум Македонец. Многу ангели поминале кај нас, меѓу нив беше и Тоше Проески и жалам што веќе го нема, меѓутоа ти си еден од ангелите кои сега ја претставуваат Македонија.

Оваа песна е македонска химна, па како што вас ве допре ‘Не куни ме, не ружи ме мајко’, мене и на сите Македонци оваа песна ни е една од најубавите што се направени. Луѓето мислат дека е народна, но ова е песна на Александар Сариевски и мислам дека тој ќе биде горд што Барбара вака ја претставува Македонија“, кажа Димитров.

На неговите коментари, Барбара се расплака, па ѝ донесоа хартиени шамивчиња на сцената за да се избрише.

Таа освен со пеењето, привлече внимание и со стилот. Прекрасната пејачка овој пат носеше златен фустан со светли и исти такви ракавици, и црна наметка, а косата ѝ беше залижана наназад.

Настапот на Барбара почнува на 1:35:59 - погледнете го видеото:

Прочитајте и „Дама се раѓа, браво девојко“ – Нашата Барбара Поповиќ го воодушеви регионот со настап во српско музичко шоу

А. Ј. | Црнобело