Сашко Коцев за родниот град: „Во Куманово секогаш се враќам со радост, таму ми се случија првите бакнежи и љубовни рани“
- Детали
- петок, 15 септември 2023
„Секое враќање на кратко или на подолго во моето Куманово за мене е посебно чувство затоа што ги среќавам оние лица што ме враќаат наназад низ годините и ме потсетуваат на сите убави моменти“, вели актерот Сашко Коцев во серијалот „За мојот роден град“ за CRNOBELO.com.
фото: Инстаграм
Актерот Сашко Коцев долги години живее во Скопје, но и покрај тоа не го заборава својот роден град Куманово.
Вели, родната грутка секогаш го влече, бидејќи таму му е семејството, ама и најдобрите другари кои ги знае откога знае за себе.
Но, за Сашко, родното Куманово секогаш ќе биде асоцијација и на првите љубови, првите бакнежи и љубовни рани.
Тој за CRNOBELO.com раскажа кои се најубавите спомени кои го врзуваат за градот и кои и сега му будат убава носталгија.
„Мислам дека секој си го сака својот роден град и секому му недостасува неговиот роден град ако е иселен и не живее веќе таму, тоа е нормално.
На секој неговиот роден град му е посебен, затоа што таму е неговото семејство, таму се неговите најблиски другари, а другар е оној што го знаеш од свои 5 години и можеш да не го сретнеш 2-3 години, а кога ќе се видите, како да не поминало воопшто никакво време.
Сфаќањата се исти, иста е смеата, иста е дружбата, иста е енергијата, исти се другарството и верноста кои сте ги имале на свои 5, 12 или 25 години.
Тој град ти е посебен затоа што таму си израснал, таму си ги научил првите работи на училиште, таму е твојот школски двор, каде што биле првите другарства, првите љубови, таму биле првите бакнежи, првите љубовни рани, првите другарски рани.
Родниот град е посебен затоа што таму еден ден си станал и си рекол: „Овој мој роден град веќе ми е мал, сакам уште поголем предизвик“ и си тргнал во новите предизвици.
Но, секогаш ќе ти стои и ќе те влече родната грутка, без разлика колку си далеку од родниот град, без оглед дали си во истата држава или во различна.
Според мене, секому неговиот роден град му е посебен.
Секое враќање на кратко или на подолго во моето Куманово за мене е посебно чувство зашто ќе ги сретнам оние лица што ме враќаат наназад низ годините и ме потсетуваат на сите убави моменти.“
Повеќе фотографии од Куманово на следната страница...
Би можело да ве интересира:
Препорачуваме
Најчитани неделава
