Интервју со Стефанни, Бразилка омажена во Кавадарци: „Мојот сопруг го запознав на брод, а и моите родители сакаат да се преселат во Македонија“

Детали

вторник, 01 декември 2020

„Живеев во Сао Паоло, еден од најголемите градови во Бразил. Сао Паоло е град во кој начинот на живот е многу брз, a во Македонија сѐ е побавно, побезбедно, се минува повеќе време со пријателите, има зеленило и спокој, а најомилено ми е што има и снег“, вели 31-годишната Стефанни.

Стефанни Дантас Нунес (31) од Сао Паоло, Бразил, работела како асистент менаџер во продавница на бродската компанија МСЦ, каде го запознала својот сегашен сопруг Македонец. Нивното пријателство за кусо време се претворило во љубов и тоа ја натерало за првпат во животот да дојде во Македонија.

Во нашата држава се вљубила на прв поглед, а веќе 7 години живее во Кавадарци, а од пред извесно време работи како онлајн новинар.

За впечатоците за Македонија, но и навиките на луѓето од нејзиниот роден Бразил таа проговори за CRNOBELO:

Колку време живееш во Македонија и што те доведе тука?

Во Македонија сум од 2013 година, односно веќе 7 години сум тука. Го сретнав мојот сопруг на брод, бев многу уверена во нашата љубов и љубопитна да ја истражам неговата култура и Македонија. 

Како се запознавте со партнерот и колку беше тешко да се одлучиш да го напуштиш Бразил?

Го запознав мојот сопруг на мојот втор договор на брод, уште од првиот ден се спријателивме, но тоа пријателство не траеше долго. По само еден месец почна нашата љубовна авантура. Бевме пет месеци заедно.

По нашиот договор, јас морав да се вратам во Бразил, а мојот сопруг во Македонија. Останавме три месеци разделени, со секојдневни разговори преку Skype. Немавме намера да се вратиме на брод, па одлучивме јас да дојдам во Македонија.

По три месеци престој во Македонија ми беше многу тешко да ги спакувам моите куфери за да се вратам назад во Бразил, така што одлучивме да се венчаме.

Во почетокот ми беше многу тешко да бидам далеку од мојата фамилија на сосема друг континент и држава и различна култура, но бев многу добродојдена од моите свекор и свекрва и од пријателите на мојот сопруг, па тие ми помогнаа многу да се чувствувам добро и до ден денес тие се мојата втора фамилија. 

Прв впечаток за Македонија ти беше...

Мојата прва импресија од Македонија уште кога слетав во Скопје беше позитивна. Ме обзема зеленилото и мирот кој го почувствував. 

Дали лесно го совлада јазикот?

Не, јазикот ми беше најголема бариера, а до ден денес уште се мачам со некои зборови затоа што азбуката е кирилица, не латиница, ми беше тешко да го совладам. Посетував часови по македонски јазик, ми помогнаа многу, денес можам да разберам скоро сѐ, но малку потешко ми е да одговорам.

Во Македонија најмногу ти се допаѓа...

Најмногу што ми се допаѓа е мирната атмосфера, исто така дека можам слободно да излезам во било кое време, и да се чувствувам безбедно. Плус, обожавам зимно време кога има снег - за мене е како да сум во бајка.

Во Македонија најмногу те нервира...

Македонија е многу убава и мала земја, штета е тоа што сѐ повеќе и повеќе од младата популација се иселуваат, ме нервира тоа што финансиите тука се многу мали за еден нормален брачен пар да живее нормално.  

Како се снајде на професионално поле? Дали работиш? Среди ли документи?

Беше многу тешко да се снајдам со работа поради ситуацијата со корона вирусот и фактот дека до пред некоја седмица немав никакви документи.

Конечно добив македонско државјанство и сум многу среќна поради тоа. Моментално работам како новинар во онлајн весник.

Колку е скап летот од Македонија до Бразил? Си одиш ли често, доаѓаат ли твоите на посета?

Зависи во кој период од годината патувате, авионскиот билет се движи од 700 до 1.000 евра. Се трудам да одам барем еднаш годишно, но сега поради пандемијата оваа година останавме во Македонија.

Досега само еднаш моите родители имаа можност да дојдат во Македонија и им остави многу позитивен впечаток што и тие сакаат една ден да дојдат да живеат овде.

Продолжува на следната страна...