Рукси Антиќ од Романија: „Љубовта ме доведе во Македонија, но тука започнав свој бизнис и оваа држава ми е дом“

Дали ти беше тешко да го научиш македонскиот јазик?

За мене најтежок е вокабуларот. Бидејќи македонскиот нема падежи, граматички е полесно за учење.

Плус, сакам јазици и учење на нови јазици. Зборувам и германски, како и малку италијански и шпански, бидејќи романскиот има латинско влијание.

Што најмногу ти се допаѓа во Македонија?

Ох, од каде да почнам? Прво, многу сум благодарна за семејството што го добив тука.

Бев многу топло пречекана и мојот сопруг се погрижи да имам сè што ми треба за да не ми недостасува Романија.

Позитивноста на луѓето е голема причина зошто уживам да живеам тука. Дури и кога има предизвици, тие секогаш велат „ќе биде добро“.

Сакам што земјата е мала, не е потребно 11 часа за да ја поминам како во Романија. Исто така, храната е многу слична, па и тој дел е одличен.

Кое е твоето омилено македонско јадење и каква е кујната во споредба со романската?

Како и во Романија, растев сакајќи сарма, па би рекла дека тоа е моето омилено јадење.

Освен тоа, многу го засакав и ајварот, кој е малку различен од тоа што се прави кај нас.

Има ли нешто од Романија што посакуваш да го има во Македонија?

Ништо посебно, за мене најважно е семејството. Градиме свое семејство овде, но понекогаш посакувам да можам почесто да ги гледам моите и да поминувам време со нив.

Што работиш во Македонија и лесно ли се снајде со работа?

На почетокот работев за неколку мултинационални компании на германски јазик затоа што не зборував добро македонски, но не бев задоволна.

Затоа, решив да се откажам и да ја вложам мојата енергија во декорирање на прослави, главно свадби.

Оваа идеја ми дојде по нашата сопствена свадба, која многу сакав да ја организирам. Така, ми дојде идејата да создадам магија и за други луѓе.

За среќа, имам и помош и не би можела да го направам сето ова сама.

Јас и Ангела работиме напорно на овој проект и многу сум благодарна за тоа. Викендов (21-23 февруари) ќе бидеме на свадбениот саем во Александар Палас со нашиот тим за декорации.

Дали имаш многу пријатели во Македонија и какви се пријателствата во споредба со романските?

Не би рекла дека имам многу, но имам неколку луѓе што ми се како семејство и знам дека можам да сметам на нив.

Моите пријатели од Романија се друга приказна. Тие ме знаат цел живот и тоа не можам да го заменам.

Иако е тешко да се признае, јазикот прави разлика. Понекогаш не можам целосно да се изразам добро на кој било друг јазик освен на мојот мајчин, иако сум флуентна и на други јазици.

Како Македонците ги третираат странците, според твоето искуство?

Ова е интересна тема. Македонците се исклучително гостољубиви кон странците, но забележав дека понекогаш се груби едни со други. Многу ми е познато, бидејќи и Романците се исти.

Немам никакво лошо искуство во Македонија, освен кога одам да вадам лична карта, но тоа е друга приказна (ха-ха).

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело