Мишел од Куманово е пица мајстор: „Работам и во Хрватска, дневно сум правел од 160 до 180 пици“

Детали

четврток, 15 февруари 2024

„Никогаш не би комбинирал ананас во пица, а најмногу сакам да правам пици со 4 до 5 состојки“, вели Мишел Стојановски од Куманово кој е пица мајстор и има работено во неколку македонски, но и неколку пицерии во Хрватска.

Мишел Стојановски (29) од Куманово е пица мајстор кој во последен период често престојува во Загреб. По многу години поминато низ пицерии во Куманово, своето професионално искуство го продолжува и во Хрватска, работејќи 7 сезони.

Во продолжение следува разговор со Мишел кој за читателите на CRNOBELO.COM открива што значи да се биде пица мајстор, кои состојки не се пожелни за комбинирање и дава совети за како да се направат вкусни пици дома.

Целото интервју во продолжение:

Мишел, каде го научи занаетот за пица мајстор? Кои се твоите почетоци?

Занаетот го научив на свои 19 години, од мојот шеф Трајче Тасиќ во ресторан Ексклузив. Нормално, во понатамошната кариера имам научено уште доста од други колеги во Македонија и Хрватска.

 

Во кои пицерии имаш работено досега?

Во својата кариера имам променето доста работни места, мојата кариера е на релација Македонија и Хрватска.

Во Куманово имам работено во доста ресторани/пицерии како што се ресторан Ексклузив, The Yard lounge bar, Пин Петрол, ресторан Браво...

Во Хрватска имам работено 7 сезони од кои првите три во Pizzeria Gajo на остров Угљен, место Преко, Задар. Една во ресторан Gastro Story во Трогир, и три во ресторан Harry’s, Водице во близина на Шибеник.

Исто така ќе го наведам и ресторанот Doomsday во Загреб каде имам работа една година.

Знаеш ли колку пици имаш направено во текот на еден ден?

Искрено немам броено, но би рекол од 160 до 180.

Кои пици најмногу сакаш да ги јадеш?

Зависи од тоа колку сум гладен. Мора да признаам дека немам некоја конкретна пица на ум. Изборот варира.

Тоа може да биде маргарита, ама некогаш може да заврши и пица со сланина, шампињони и многу лук.

Според тебе, која комбинација на состојки не смее да комбинира во пица?

Секој има свој избор, но јас никогаш не би комбинирал ананас во пица или слатка пица.

Кои пици најмногу сакаш да ги подготвуваш?

Оние пици кои имаат од 4 до 5 состојки. 

Си имал контакт со луѓе од целиот свет. Имаш ли применето какви пици најмногу нарачуваат туристи од Франција, Германија, Англија, Шпанија, Италија... и секако, Македонија?

Да, нормално дека има разлика. Работев доста долго со туристи, но сепак сè се сведува на личниот вкус на гостинот.

Германците би рекол дека секогаш се за некоја комбинација на месо, додека Италијанците се базирани повеќе на разновидните кашкавали и сирења и доста зеленчук. Но, сепак мислам дека капричиозата е на прво место.

Имаш ли твој рецепт за вкусна домашна пица?

Да, имам правено пица дома, но никогаш не би била со ист вкус како од пицерија.

Може ли да споделиш некој трик што ќе им биде од корист на сите што по дома често прават пици?

Секогаш печете на најјако.

Може ли да очекуваме твоја пицерија наскоро?

Па не би рекол во блиска иднина, но можно е.

© CRNOBELO.com Забрането преземање и копирање. Крадењето на авторски текстови е казниво со закон.

Е. Х. | Црнобело