Верица од Струмица вежба фитнес на шипка: „Има негативни коментари, но ова е спорт кој бара голема подготвеност“

Детали

среда, 03 јануари 2024

„Многупати сум слушнала негативни коментари, но, тоа доаѓа од луѓе кои не знаат какво е чувството кога со сопствена тежина ќе успееш да се кренеш и да направиш одредено движење на шипка. Овој спорт навистина е спорт кој не само што помага во зајакнувањето на мускулите, туку и во зајакнувањето на карактерот и трпеливоста“, вели Верица која една и пол година вежба фитнес на шипка (pole fitness), а работи како стоматолог.

Верица Шајкарова (26) од Струмица е дипломиран доктор по дентална медицина и стоматолог во приватна ординација.

Иако ја обожава својата професија, Верица подеднакво ужива и во вежбањето.

Таа веќе 9 години редовно оди во теретана, но од пред една и пол година, вежба и фитнес на шипка (pole fitness), кој станува сè попопуларен кај нас.

Во студиото каде што вежба одат и момци и девојки, но многу од нив брзо се откажуваат, ако по неколку месеци не успеат да изведат некоја од вежбите.

Верица вели дека ова не е стриптиз, и дека понекогаш се соочува со негативни реакции и лоши коментари од луѓето, кога ќе дознаат дека вежба на шипка.

За сите предизвици кои ги носи овој начин на вежбање, Верица ни раскажа во интервјуто за CRNOBELO.com, и искрено вели дека се надева дека ќе ги мотивира и другите да го пробаат фитнесот на шипка:

Како започна да се занимаваш со вежбање на шипка? Пред колку време? Колкупати неделно вежбаш?

Вежбањето на шипка т.е Pole fitness ми беше многу голем предизвик од моментот кога почнав да тренирам во теретана, но бидејќи живеев во Струмица, немав можност да го искусам.

По одреден период се преселив во Скопје, па решив да се запишам и да пробам.

За мене тоа беше многу голем чекор и впуштање во едно сосема поразлично искуство.

Дали спортуваше нешто друго пред тоа?

Тренирам една и пол година, двапати неделно во студиото Pole people во Скопје, кое постои веќе 10 години.

Во последните три месеци за викенди вежбам и дома на моја шипка.

Истовремено вежбам и во теретана веќе 9 години без престан и тоа многу ми помага во однос на силата што ми е потребна за фитнесот на шипка (pole fitness).

Имаше ли на почетокот негативни коментари од одредени личности и проблем во прифаќањето на овој начин на танцување?

Почетокот на ова искуство беше многу голем предизвик за мене - прво дали ќе се пронајдам во самиот спорт, а потоа како луѓето околу мене ќе го прифатат сето тоа.

Бидејќи самиот спорт Pole fitness кај нас, за жал, не е доволно развиен и многу луѓе не се запознаени со тоа, кога ќе им кажеш дека вежбаш на шипка, коментарот веднаш е - стриптиз.

Кога почнав, се соочував со многу негативни коментари и проблем во самото прифаќање, но најбитно ми беше тоа што сепак моите најблиски ме поддржуваат во тоа што го правам, а тие што ме познаваат знаат дека не се откажувам од тоа што ме исполнува и ме прави среќна.

Морам да кажам дека ова е спорт што секој може да го проба, но само луѓето кои навистина се спремни да се движат по потешкиот пат, да не се откажат, луѓе кои знаат дека убавите работи не доаѓаат така лесно, кои се спремни да се борат - токму тие луѓе успеваат и продолжуваат.

А, овој спорт бара навистина многу посветеност и излегување од зоната на комфор.

Многупати сум слушнала и коментари од типот на тоа дека ако не успеам во кариера, ова ќе ми биде втора опција.

Но, тоа доаѓа од луѓе кои не знаат какво е чувството кога со сопствена тежина ќе успееш да се кренеш и да направиш одредено движење на шипка, со тоа што во исто време си свесен дека постои ризик да не се повредиш.

Едноставно, во тој момент му веруваш на сопственото тело и резултатот на крај е исто како да си го искачил најголемиот врв.

Овој спорт навистина е спорт кој не само што помага во зајакнувањето на мускулите, туку и во зајакнувањето на карактерот и трпеливоста.

Колку твоето тело се промени откако танцуваш на штипка? Се зголеми ли еластичноста? 

Моето тело стана многу поеластично, затегнато и дефинирано.

Секако, тоа не се должи само на фитнес тренинзите на шипка, туку и на вежбањето во теретана, внесувањето доволно протеини во текот на денот, многу течности и доволен сон.

Навистина е предизвик целата своја тежина да ја држиш на раце и сето тоа бара многу труд, вежбање и посветеност.

Продолжува на следната страница...