Славица Момировска: „Њујорк за мене е центар на светот, во Тајланд кривично дело е да се навредува кралот“

Детали

вторник, 06 јули 2021

Од Мексико до Бангкок, преку Мајами и Њујок, до Данска и Шпанија, нејзиниот пасош брои многу печати, а таа брои спомени, доживувања и пријателства. Вели дека најшармантни се Латиноамериканците, ги обожава мексиканските плажи, а што се случува во Лас Вегас, таму и останува. За Славица Момировска (32) од Гостивар патувањата се храна на душата и едвај чека да заврши пандемијата за да ги спакува куферите со карта за Доминиканската Република...

Славица Момировска (32), политиколог и магистер по дипломатија и политички науки, од Гостивар е вљубеничка во патувањата која има извесен период живеено во САД, а од сите посетени земји досега како омилена ја издвојува Мексико. Од плажи до гостопримливост на локалците, вели дека Мексико е дестинација која ја освоила во секој поглед.

Од друга страна пак вели дека покрај сета убавина која ја сервираат патувањата има и некои немили настани, како на пример кога при посетата на Тајланд два дена јадела само пица, затоа што не ѝ се допаднал вкусот на нивната храна, која била сосема поразлична од нашата.

Сепак, како највпечатлив спомен оттаму го носи капењето со слонови, кое вели дека е незаборавно искуство.

За искуствата од патувањата Славица открива за CRNOBELO.com…

Омилена дестинација што ја имаш посетено и каде што посакуваш повторно да се вратиш?

Имам посетено триесетина земји досега, но дефинитивно Мексико ми е омилена... Тоа е земјата на сомбрерата, текилите, тортиљите и омилениот чили сос.

Патувањето во Мексико ми е останато како еден од најубавите спомени. Мексиканците се доста пријатен и гостопримлив народ. Од преубавите рајски плажи на Канкун, тиркизното Карипско море, до културните богатства на Јукатан, Чичен Ица, центарот на Маите, тамошните селца и вредниот и мил народ, заедно со вкусната храна...

Мексико дефинтиивно е дестинација која повторно сакам да ја посетам, едноставно прекрасните мексикански плажи, звукот на маријачите, лудиот ноќен живот, прекрасната храна, погледот кон морскиот свет на Кариби е нешто што треба повторно да се доживее.

Дали би се отселила од Македонија и која држава е твојот избор за втор дом?

Ако би се отселила, сигурно би било некаде каде што е претежно сончево, каде што има море, пријатен народ... Но, да оставиме да испитам уште многу дестинации кои ми се на листата, па да одлучам потоа.

Сега за сега сум дома, во Македонија, со сите луѓе кои ми ја греат душата.

Какво беше твоето искуство со „Work and travel“ програмата во САД?

Животно искуство! Лично јас сум многу задоволна од оваа програма. Америка која некогаш сме ја гледале и чувствувале само на платно е предизвик да ја запознаеш лично.

Од свое искуство тврдам дека е скок за јакнење и осамостојување како личност, како и можност за отворање на поразлични видици кон културите и светот. Работата во средина каде што се цени трудот, те ценат како работник и доколку си квалитетен имаш можност за унапредување.

Запознав многу млади и амбициозни студенти од цел свет кои исто летуваа и работеа во Америка, се родија многу пријателства со луѓе од таму и од секаде кои траат до ден денес и сум горда на тоа.

Работев, а во слободното време патував низ Америка, голем дел од Њу Џерси бидејќи и таму живеев, потоа Вашингтон, Њујорк, Филадефија, Мајами, Лос Анџелес, Сан Франциско, Вегас итн.

Дали ја препорачуваш оваа програма на сегашните студенти?

Препорачувам сите кои имаат желба и можност да не се двоумат и да учествуваат барем едно лето на „Work and Travel“ програмата. Ќе се надополнат со едно искуство плус.

Какви се Американците како пријатели и колеги?

Американците едноставно си го гледаат својот начин на живот. Не сакаат многу близина но од друга страна тоа не ги прави лоши пријатели,  туку таков е нивниот начин на живот.

Добри се, пријатели се! Битно е да си човек и да ги негуваш оние вистински вредности, а тоа од каде си е само различен стил на живеење и култура.

Мајами или Њујорк и зошто?

Ухх, Њујорк, зошто едноставно ја сакам „џунглата“ идентично опеана од Алиша Кис. Њујорк едноставно е центар на светот! Го сакам метежот таму, буквално е град кој никогаш не спие.

Ја сакам брзината на работниците кои дури и кога пешачат тие работат, го сакам вкусот на кафето испиено на 5-та авенија и вкусниот „уличен“ познат хот дог... Едноставно е град кој те купува во сите 4 годишни времиња.

Лас Вегас... дали е она што го гледаме на телевизија?

Лас Вегас е и повеќе од она што го гледаме на телевизија.

Вегас е единствено место каде што парите „зборуваат“ и викаат ЧАО, како што кажал Френк Синатра. Место каде што можеш да направиш сè што си посакал и замислил, но ќе се задржам тука за да ве мотивирам сами да го искусите и посетите затоа што навистина е „What happened in Vegas, stays in Vegas“.

Тајланд е твојата прва посетена ориентална дестинација... Кои беа твоите впечатоци во првиот миг при допирот со оваа култура?

Да, Тајланд е нешто многу поразлично од она што е блиску до нас! Една поразлична и би рекла специфична култура. Искрено кога првпат стапнав во Бангкок сè ми се виде многу бучно и хаотично, а и првиот ден мислев дека цело патување нема да јадам ништо, но во текот на патувањето ги почувствував убавините на таа култура и земја.

Од Бангкок кој важи за еден од најпознатите азиски космополитски градови, до преубавите острови Phi Phi и авантурите низ Chiang Mai, од уживањето, хранењето и капењето на слонови, до храбриот чекор и посетата на кралството на тигрите, авантурите со Zip Line, мора да признаам дека имаше низа незаборавни мигови.

Какви се цените во Тајланд на храна и пијалаци?

Цените се солидни, со оглед на тоа дека се наоѓаш на друг крај на светот, можам да речам дури и ниски.

Дали вкуси некој традиционален деликатес?

Pad Thai, нешто што можев да го јадам, не експeриментирав многу со тамошната храна, ама затоа уживав во достапноста на разни тропски овошја.

Омилениот дел од патувањето во Тајланд?

Уживањето на Crabi и Phi Phi островот и посетата на плажата Maya Bay каде што е сниман филмот на Леонардо Ди Каприо – „The Beach“. Пловењето по кристалната вода со Thai чамчињата и разговорите со мештаните кои споделуваа разни искуства од нивното секојдневие.

Продолжува на следната страна...