Сладолед, ражничи и уште 3 идеи што да направите кога имате голема лубеница, за да не ви скапе

Сладолед, коцки мраз, ражничи, овошна салата... Што сѐ можете да направите од лубеница? Ќе ви бидат потребни овие идеи за да не ви скапе големата лубеница која сте ја купиле, а не можете да ја дојадете. 

Пазарите се преполни со нив, но се чини дека многу тешко може да се најдат помали лубеници, па често се случува да остане и да скапе. 

Во продолжение погледнете неколку едноставни рецепти за тоа што можете да направите од преостаната лубеница што не сте успеале да ја изедете.

Коцки мраз од лубеница

Сите знаат дека лубеницата е полна со вода, па затоа е идеална за подготовка на коцки мраз со вкус.

Парчињата лубеница се чистат од семки, се рендаат, а потоа се распоредуваат во садови за мраз.

Можете да ги користите за коктели или за другите пијалаци.

Сладолед од лубеница

Потребни ви се околу 375-400g лубеница (исечени парчиња и прочистени од семки).

Парчињата лубеница се пасираат во блендер и се ставаат во калапи за сладолед, па се оставаат да отстојат околу 3 часа во замрзнувач или преку ноќ.

За шарени сладоледи, калапите може да се дополнат со пасирани киви од блендер.

Смути од лубеница

Во блендер се ставаат околу 150g лубеница (прочистена од семки и исечкана), 1 помала банана (излупена и исечкана) и околу 100ml сок од јаболко.

Сите состојки се мешаат во блендер.

Ражничи од лубеница

На стапчиња за ражничи можете да наредите коцкички лубеница и парчиња моцарела и да ги комбинирате со свежи листови нане или босилек.

Ражничите се прелеваат со балсамико крем по ваш избор.

Овошна салата од лубеница и малини со крем сирење

Во длабок сад се ставаат околу 1kg лубеница исечкана на мали париња.

Во друг сад се мешаат 250g крем сирење, ½ лажица екстракт од ванила и 1 лажица кафеав шеќер.

Лубеницата се меша со уште 125g свежи малини и се прелева со сосот од крем сирење.

Б. С. Б. | Црнобело